യഥാർത്ഥ വിശ്വാസികൾ ആചാരങ്ങളെ ചോദ്യം ചെയ്യില്ല! അവിശ്വാസികൾക്ക് ആചാരങ്ങളിൽ ഇടപെടാൻ അവകാശമില്ല ! സുപ്രധാന നിരീക്ഷണവുമായി സുപ്രീംകോടതി

ദില്ലി : ശബരിമല യുവതി പ്രവേശനവുമായി ബന്ധപ്പെട്ട കേസിൽ സുപ്രധാന നിരീക്ഷണങ്ങളുമായി സുപ്രീം കോടതി ഭരണഘടനാ ബെഞ്ച്. യഥാർത്ഥ വിശ്വാസികൾ മതപരമായ ആചാരങ്ങളെ ചോദ്യം ചെയ്യില്ലെന്നും അവിശ്വാസികൾക്ക് ആചാരങ്ങളിൽ ഇടപെടാൻ അവകാശമില്ലെന്നും ജസ്റ്റിസ് ബി.വി. നാഗരത്ന വ്യക്തമാക്കി. ശബരിമല തന്ത്രി കണ്ഠരര് രാജീവരർക്ക് വേണ്ടി ഹാജരായ അഭിഭാഷകന്റെ വാദത്തിനിടെയായിരുന്നു സുപ്രധാനമായ ഈ നിരീക്ഷണം.

വിശ്വാസികളല്ലാത്തവർ നൽകിയ ഹർജികൾ കോടതി എന്തിനാണ് പരിഗണിക്കുന്നതെന്ന് ജസ്റ്റിസ് നാഗരത്‌ന നേരത്തെയും ചോദിച്ചിരുന്നു. പല ഹർജികളും പ്രത്യേക അജണ്ടകളോടെയാണ് കോടതിയിൽ എത്തുന്നതെന്നും, ഇത്തരം പൊതുതാൽപര്യ ഹർജികൾ സ്വീകരിക്കുന്നതിലെ യുക്തി ചോദ്യം ചെയ്യപ്പെടേണ്ടതാണെന്നും അവർ ഓർമ്മിപ്പിച്ചു. സ്ത്രീകൾക്ക് പ്രവേശനം വേണമെന്ന് ആവശ്യപ്പെട്ട് ഏതെങ്കിലും യഥാർത്ഥ അയ്യപ്പ ഭക്തർ ഹർജി നൽകിയിട്ടുണ്ടോ എന്ന് ആരാഞ്ഞ കോടതി, മതപരമായ കാര്യങ്ങളിൽ ബാഹ്യ ഇടപെടലുകൾ പാടില്ലെന്ന സൂചനയാണ് നൽകിയത്.

അതേസമയം, ചില ആചാരങ്ങൾ അന്ധവിശ്വാസമാണോ എന്ന് പരിശോധിക്കാൻ കോടതിക്ക് അധികാരമുണ്ടെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡ് നിരീക്ഷിച്ചു. മതപരമായ കാര്യങ്ങളിൽ അവസാന വാക്ക് നിയമസഭയുടേത് മാത്രമാണെന്ന് പറയാനാകില്ലെന്നും കോടതി വ്യക്തമാക്കി. എന്നാൽ, മാനവികതയെ ബാധിക്കുന്നതോ പൊതുസമാധാനത്തിന് ഭീഷണിയാകുന്നതോ ആയ ആചാരങ്ങളിൽ കോടതി ഇടപെടേണ്ടതുണ്ടെന്ന് ജസ്റ്റിസ് നാഗരത്‌നയും ചീഫ് ജസ്റ്റിസും ഒരുപോലെ അഭിപ്രായപ്പെട്ടു. മനുഷ്യബലി പോലുള്ള പ്രാകൃതമായ ആചാരങ്ങൾ നടന്നാൽ കോടതിക്ക് മൗനം പാലിക്കാനാകില്ലെന്നും ചീഫ് ജസ്റ്റിസ് ചൂണ്ടിക്കാട്ടി.