ഭാരതത്തിന് മേൽ ട്രമ്പ് ഭരണകൂടം വീണ്ടും അധിക തീരുവ ചുമത്തിയേക്കും ; മുന്നറിയിപ്പുമായി അമേരിക്കൻ ട്രഷറി സെക്രട്ടറി; അന്തിമ തീരുമാനം നാളെ നടക്കുന്ന ട്രമ്പ് – പുടിൻ കൂടിക്കാഴ്ചയ്ക്ക് ശേഷം

വാഷിങ്ടൻ ഡി സി : ഭാരതത്തിന് മേൽ ട്രമ്പ് ഭരണകൂടം വീണ്ടും അധിക തീരുവ ചുമത്തിയേക്കുമെന്ന് അമേരിക്കൻ ട്രഷറി സെക്രട്ടറി സ്‌കോട് ബെസ്സന്റ്. നാളെ അലാസ്‌കയില്‍ വച്ച് നടക്കുന്ന ട്രമ്പ് – പുടിൻ കൂടിക്കാഴ്ചയ്ക്ക് ശേഷമായിരിക്കും ഇതുസംബന്ധിച്ച അന്തിമ തീരുമാനമെന്നും ബെസ്സന്റ്പറഞ്ഞു. യുക്രെയ്ന്‍ – റഷ്യ യുദ്ധം അവസാനിപ്പിക്കുന്നതിനായി നടക്കുന്ന ട്രംപ്-പുട്ടിന്‍ കൂടിക്കാഴ്ച പരാജയപ്പെട്ടാൽ ഉഇന്ത്യയ്ക്കുമേല്‍ അധിക തീരുവ ട്രമ്പ് ചുമത്താനിടയുണ്ടെന്നാണ് സ്കോട് ബെസ്സന്റിന്റെ മുന്നറിയിപ്പ്.

ഇന്ത്യയില്‍ നിന്നുള്ള ഇറക്കുമതിയ്ക്ക് 25 ശതമാനം തീരുവ ഏര്‍പ്പെടുത്തിയ ട്രംപ് റഷ്യയുടെ പക്കല്‍നിന്ന് ആയുധങ്ങളും എണ്ണയും വാങ്ങുന്നതായി ചൂണ്ടിക്കാട്ടി 25 ശതമാനം കൂടി തീരുവ വര്‍ധിപ്പിച്ചിരുന്നു. നിലവില്‍ ഇന്ത്യന്‍ ഇറക്കുമതിയ്ക്ക് 50 ശതമാനം തീരുവയാണ് അമേരിക്ക ചുമത്തിയിരിക്കുന്നത്.

ഈ മാസം ആറാം തീയതിയാണ് ഭാരതത്തിന് മേൽ 50 ശതമാനം തീരുവ ഏർപ്പെടുത്താനുള്ള ട്രമ്പിന്റെ ഉത്തരവ് പുറത്തുവന്നത്. എന്നാൽ നാലു ദിവസത്തിനിപ്പുറവും ഇത് പിൻവലിക്കണമെന്ന ആവശ്യവുമായി ഭാരതം അമേരിക്കൻ ഭരണകൂടത്തെ സമീപിച്ചിട്ടില്ല. ദേശീയ താത്പര്യം ഉയർത്തിക്കാട്ടി അമേരിക്കൻ നീക്കത്തെ നേരിടും എന്ന സന്ദേശമാണ് ഇതിലൂടെ ഭാരതം നൽകിയത്. അമേരിക്കൻ ഉത്പന്നങ്ങൾക്കും ഇന്ത്യ പകരം തീരുവ പ്രഖ്യാപിക്കും എന്നാണ് കരുതുന്നത്.

അമേരിക്കയിൽ നിന്നുള്ള അലുമിനിയം, സ്റ്റീൽ എന്നിവയ്ക്ക് 50 ശതമാനത്തിന് മുകളിൽ തീരുവ ഏർപ്പെടുത്താനുള്ള ശുപാർശ കേന്ദ്ര മന്ത്രിസഭ ചർച്ച ചെയ്തേക്കും. ലോകവ്യാപാര കരാറിൻറെ ലംഘനമാണ് അമേരിക്ക നടത്തിയതെന്ന് ചൂണ്ടിക്കാട്ടി ഇതിനകം ഇന്ത്യ പരാതി നല്കിയിട്ടുണ്ട് എന്നാണ് സൂചന. അമേരിക്കയിൽ നിന്ന് ഇന്ത്യയിലേക്ക് വരുന്ന തുണിത്തരങ്ങൾക്കും തീരുവ കുത്തനെ ഉയർത്താനുള്ള നിർദേശവും പരിഗണനയിലാണ്.