തിരുവനന്തപുരം നഗരം കുടിവെള്ളം കിട്ടാതെ വലയുമ്പോഴും തിരിഞ്ഞു നോക്കാതെ നഗരസഭ; ഇന്നലെ ജലവിതരണം പുനഃസ്ഥാപിക്കുമെന്ന മന്ത്രിയുടെ വാക്ക് പാഴായി; ജനരോഷം ഉയർന്നപ്പോൾ ഒടുവിൽ കൺട്രോൾ റൂം തുറന്നു

തിരുവനന്തപുരം: നഗരം കുടിവെള്ളം കിട്ടാതെ വലയുമ്പോഴും നഗരസഭ തിരിഞ്ഞു നോക്കുന്നില്ലെന്ന് പരാതി. തിരുവനന്തപുരം നഗരസഭയുടെ ഭൂരിഭാഗം വാർഡുകളിലും കുടിവെള്ളം ലഭിക്കാതായിട്ട് നാലുദിവസം പിന്നിട്ടിട്ടും നഗരസഭ പകരം സവിധാനമൊരുക്കിയില്ലെന്നാണ് പരാതി. കന്യാകുമാരി റെയിൽപാത ഇരട്ടിപ്പിക്കൽ ജോലികളുടെ ഭാഗമായി കുടിവെള്ള പൈപ്പുകൾ മാറ്റി സ്ഥാപിക്കുന്ന പ്രവർത്തനങ്ങൾ നടക്കുന്നതിനാൽ രണ്ടു ദിവസം കുടിവെള്ള വിതരണം തടസപ്പെടുമെന്നായിരുന്നു അറിയിപ്പ് എന്നാൽ രണ്ടു ദിവസത്തിനുള്ളിൽ ജോലി പൂർത്തിയാക്കാൻ കഴിയാതെ വന്നതോടെ പ്രതിസന്ധി ഉടലെടുത്തു. നഗരത്തിലെ തടസ്സപ്പെട്ട കുടിവെള്ള വിതരണം ഇന്ന് പുനരാരംഭിക്കുമെന്ന പ്രതീക്ഷയിലായിരുന്ന ജനത്തിന് ഇത് തിരിച്ചടിയായി. ഇന്ന് പുലർച്ചെ ഭാഗികമായി തുടങ്ങിയ പമ്പിങ് നി‍ർത്തിവെച്ചു. വാൽവിൽ ലീക്ക് കണ്ടതിനെ തുടർന്നാണ് പമ്പിങ് നിർത്തിയത്. പൈപ്പിടൽ ജോലികളും പൂർത്തിയായിട്ടില്ല. ഉച്ചയ്ക്ക് മുൻപായി താഴ്ന്ന പ്രദേശങ്ങളിൽ വെള്ളമെത്തിക്കുമെന്നായിരുന്നു മന്ത്രി വി ശിവൻകുട്ടി ഇന്നലെ നൽകിയ ഉറപ്പ്. ഉയർന്ന പ്രദേശങ്ങളിലും വൈകീട്ടോടെ കുടിവെള്ള വിതരണം പുനസ്ഥാപിക്കാനാകുമെന്നാണ് വാട്ടർ അതോറിറ്റി അറിയിച്ചത്.

ഇന്ന് വൈകുന്നേരത്തോടെ കുടിവെള്ള വിതരണം പുനഃസ്ഥാപിക്കുമെന്നാണ് ഇപ്പോൾ അധികൃതരുടെ ഉറപ്പ്. എന്നാൽ ജില്ലയുടെ ചുമതലയുള്ള മന്ത്രി വി ശിവൻകുട്ടിയുടെ ഉറപ്പ് പാലിക്കപ്പെടാത്തതിൽ ജനങ്ങൾ പ്രതിഷേധമുയർത്തി. ഇത്തരം ജോലികൾ ചെയ്യുന്നതിന് മുമ്പ് പകരം സംവിധാനം ഉറപ്പാക്കേണ്ട നഗരസഭ മൗനം പാലിച്ചു. ടാങ്കറുകളിൽ വെള്ളമെത്തിക്കാനുള്ള വിപുലമായ സംവിധാനങ്ങൾ ചെയ്യേണ്ടതിന് പകരം സിപിഎം ഭരിക്കുന്ന നഗരസഭ നിസംഗത പാലിച്ചുവെന്നാണ് പരാതി. നഗര ജനത കുടിവെള്ളത്തിനായി നെട്ടോട്ടമോടുമ്പോഴും ടാങ്കറുകളിൽ വെള്ളമെത്തിക്കാനുള്ള വിപുലമായ സംവിധാനം വാട്ടർ അതോറിറ്റിയും ഉറപ്പുവരുത്തിയില്ല.

ജനങ്ങളുടെ പ്രതിഷേധം ശക്തമായതിനെ തുടർന്ന് നാലാം ദിവസമായ ഇന്നാണ് നഗരസഭ കണ്ട്രോൾ റൂം തുറന്നത്. വാൽവുകളിലെ ലീക്ക് പരിഹരിച്ച് ജംഗ്ഷൻ കോൺക്രീറ്റ് ചെയ്‌ത്‌ ബലപ്പെടുത്തിയാലുടൻ ഇന്ന് വൈകുന്നേരത്തോടെ ജലവിതരണം ഭാഗീകമായെങ്കിലും പുനഃസ്ഥാപിക്കാൻ കഴിയുമെന്ന് മന്ത്രി റോഷി അഗസ്റ്റിൻ അറിയിച്ചു.