ഒന്നരവർഷമായിട്ടും മുന്നണിയുടെ ലക്ഷ്യങ്ങൾ കൈവരിക്കാനായില്ല ! മിനിമം ഒരു പൊതുപരിപാടിപോലും നടത്താനായില്ല ! ആംആദ്മി പാർട്ടിയുമായുള്ള സഖ്യം അവസാനിപ്പിച്ച് ട്വന്റി20 പാർട്ടി

ട്വന്റി20 പാർട്ടിയും ആംആദ്മി പാർട്ടിയും സഖ്യത്തിൽ നിന്ന് വേർപിരിയുന്നു. ട്വന്റി20 പാർട്ടി പ്രസിഡന്റും പ്രമുഖ വ്യവസായിയുമായ സാബു എം. ജേക്കബാണു പീപ്പിൾസ് വെൽഫയർ അലയൻസ് (PWA) എന്ന സഖ്യം പിരിച്ചുവിട്ടതായി അറിയിച്ചത്. 2022 മേയ്‌ 15നാണു കിഴക്കമ്പലം കിറ്റെക്സ് ഗ്രൗണ്ടിൽ നടന്ന മഹാസമ്മേളനത്തിൽവച്ചു സാബു എം. ജേക്കബും അരവിന്ദ് കേജ്‌രിവാളും ചേർന്ന് സഖ്യം കേരളത്തിൽ പ്രഖ്യാപിച്ചത്.

“കഴിഞ്ഞ ഒന്നരവർഷമായിട്ടും മുന്നണിയുടെ ലക്ഷ്യങ്ങൾ കൈവരിക്കാനോ മിനിമം ഒരു പൊതുപരിപാടി തയാറാക്കാനോ സാധിച്ചിട്ടില്ല. ആയതിനാൽ പീപ്പിൾസ് വെൽഫയർ അലയൻസ് (PWA) എന്ന സഖ്യം തുടരുന്നതു രാഷ്ട്രീയമായും സംഘടനാപരമായും ട്വന്റി 20യ്ക്കു ഗുണകരമാകില്ലെന്നു ബോധ്യപ്പെട്ടു. അതിനാലാണ് സഖ്യം വിടാനുള്ള തീരുമാനം. സഖ്യം പിരിയുന്നതു സംബന്ധിച്ച ആംആദ്മി പാർട്ടി ദേശീയ കൺവീനർ അരവിന്ദ് കേജ്‌രിവാളിന് ഔദ്യോഗിക അറിയിപ്പ് ഇമെയിൽ വഴി അറിയിച്ചു

കടുത്ത സാമ്പത്തിക രാഷ്ട്രീയ പ്രതിസന്ധികളിലൂടെയാണു കേരളം കടന്നുപോകുന്നത്. അഴിമതിയും ധൂർത്തും കുറ്റകൃത്യങ്ങളും വർഗീയതയും പെരുകിവരുന്നു. രാഷ്ട്രീയ ഉദ്യോഗസ്ഥ ലോബികളുടെ കരാളഹസ്തങ്ങളിൽനിന്നു കേരളത്തെ വീണ്ടെടുക്കാനും മലയാളികളുടെ വികസനസ്വപ്നങ്ങളെ സാക്ഷാത്കരിക്കാനും ട്വന്റി20 ശക്തമായി പ്രവർത്തിക്കും” – സാബു എം. ജേക്കബ് പറഞ്ഞു.