കരിങ്കടലിൽ റഷ്യൻ പടക്കപ്പൽ ആക്രമിച്ച് യുക്രെയ്ൻ ; നൊവോറോസിസ്ക് നേവൽ ബേസ് വഴിയുള്ള ഗതാഗതം റഷ്യക്ക് താത്കാലികമായി നിർത്തി വയ്‌ക്കേണ്ടി വന്നു !

കീവ് : അമേരിക്കയുടെയും പാശ്ചാത്യ ശക്തികളുടെയും അകമഴിഞ്ഞ സൈനിക സഹായം മുതലാക്കി റഷ്യക്കെതിരെ ആക്രമം ശക്തമാക്കി യുക്രെയ്ൻ. കരിങ്കടലിൽ നങ്കൂരമിട്ടിരുന്ന റഷ്യൻ പടക്കപ്പലിന് കഴിഞ്ഞ ദിവസം അർധരാത്രി നടന്ന നാവിക ഡ്രോൺ ആക്രമണത്തിൽ വൻതോതിൽ നാശനഷ്ടം സംഭവിച്ചതായി യുക്രെയ്ൻ അവകാശപ്പെട്ടു. നൂറിലധികം റഷ്യൻ സൈനികരും ജീവനക്കാരും കപ്പലിനുള്ളിൽ ഉണ്ടായിരിക്കെയാണ് ആക്രമണമെന്ന് യുക്രെയ്ൻ ഇന്റലിജൻസ് വ‍ൃത്തങ്ങൾ അവകാശപ്പെട്ടു. 450 കിലോയിലധികം സ്ഫോടകവസ്തുക്കളുമായാണ് ഡ്രോൺ ആക്രമണം നടത്തിയതെന്നും അവർ വ്യക്തമാക്കി. നൊവോറോസിസ്കിലെ നേവൽ ബേസിലാണ് ആക്രമണം നടന്നതെന്നാണ് വിവരം. സ്വന്തം തീരത്തുനിന്നും ഏറെ മാറി റഷ്യൻ യുദ്ധക്കപ്പലിനെതിരെ ഡ്രോൺ ഉപയോഗിച്ച് നടത്തിയ ആക്രമണം യുക്രെയ്ന് കൂടുതൽ ആത്മവിശ്വാസം നൽകുന്നതാണ് എന്നാണ് വിലയിരുത്തപ്പെടുന്നത്.

റഷ്യയിൽ നിന്നുള്ള കയറ്റുമതികളുടെ പ്രധാന കേന്ദ്രമാണ് നൊവോറോസിസ്കിലെ നേവൽ ബേസ്. ലോകത്തെ ആകെ ഇന്ധന വിതരണത്തിന്റെ 2 ശതമാനവും ഇവിടെയാണ് കൈകാര്യം ചെയ്യുന്നത് എന്നാണ് കണക്ക്. ആക്രമണത്തെ തുടർന്ന് താത്കാലികമായി നിർത്തി വച്ച ഇതുവഴിയുള്ള കപ്പൽ ഗതാഗതം ഇടവേളയ്ക്കു ശേഷമാണ് പുനരാരംഭിച്ചത്. റഷ്യൻ യുദ്ധക്കപ്പലിനു നേരെയുള്ള ഡ്രോൺ ആക്രമണത്തിന്റെ വിഡിയോ ദൃശ്യങ്ങൾ സമൂഹ മാദ്ധ്യമങ്ങളിലടക്കം വ്യാപകമായി പ്രചരിക്കുന്നുണ്ട്.

എന്നാൽ യുക്രെയ്ന്റെ അവകാശവാദം റഷ്യ തള്ളിക്കളഞ്ഞിരിക്കുകയാണ്. നാവിക താവളത്തിലെ യുദ്ധക്കപ്പൽ ലക്ഷ്യമിട്ട് രണ്ട് നാവിക ഡ്രോണുകൾ ഉപയോഗിച്ച് യുക്രെയ്ൻ നടത്തിയ ആക്രമണ ശ്രമം തകർത്തതായാണ് റഷ്യൻ പ്രതിരോധ മന്ത്രാലയം അവകാശപ്പെട്ടത്. കപ്പലിനോ നാവിക താവളത്തിനോ ഏതെങ്കിലും വിധത്തിലുള്ള നാശനഷ്ടം സംഭവിച്ചതായി അവരുടെ പ്രസ്താവനയിലില്ല.