ബംഗ്ലാദേശിൽ വീണ്ടും ഹിന്ദുഹത്യ!! ഹിന്ദുവായ സുരക്ഷാ ജീവനക്കാരനെ വെടിവച്ചു കൊന്ന് സഹപ്രവർത്തകൻ ; പത്തു ദിവസത്തിനിടെ റിപ്പോർട്ട് ചെയ്യുന്ന മൂന്നാമത്തെ മരണം

ബംഗ്ലാദേശിൽ ന്യൂനപക്ഷ വിഭാഗങ്ങൾക്ക് നേരെയുള്ള അക്രമങ്ങൾ തുടരുന്നതിനിടയിൽ, വീണ്ടും ഒരു ഹിന്ദു യുവാവ് കൂടി കൊല്ലപ്പെട്ടു. മൈമെൻസിംഗ് ജില്ലയിലെ ഭാലുക്ക ഉപജിലയിൽ ഇന്നലെ വൈകുന്നേരമാണ് ദാരുണമായ ഈ സംഭവം അരങ്ങേറിയത്. ലബീബ് ഗ്രൂപ്പിന്റെ കീഴിലുള്ള സുൽത്താൻ സ്വീറ്റേഴ്സ് ലിമിറ്റഡ് എന്ന ഗാർമെന്റ് ഫാക്ടറിയിൽ സുരക്ഷാ ഉദ്യോഗസ്ഥനായി ജോലി ചെയ്തിരുന്ന ബജേന്ദ്ര ബിശ്വാസാണ് വെടിയേറ്റ് മരിച്ചത്. പത്തു ദിവസത്തിനുള്ളിൽ രാജ്യത്ത് റിപ്പോർട്ട് ചെയ്യപ്പെടുന്ന മൂന്നാമത്തെ ഹിന്ദു യുവാവിന്റെ കൊലപാതകമാണിതെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

ബംഗ്ലാദേശ് അൻസാർ എന്ന അർദ്ധസൈനിക വിഭാഗത്തിലെ അംഗമായിരുന്നു കൊല്ലപ്പെട്ട ബജേന്ദ്ര ബിശ്വാസ്. ഫാക്ടറിയിലെ സുരക്ഷയ്ക്കായി നിയോഗിക്കപ്പെട്ട ഇരുപതോളം അൻസാർ ഉദ്യോഗസ്ഥരിൽ ഒരാളായിരുന്നു അദ്ദേഹം. കൂടെ ഡ്യൂട്ടിയിലുണ്ടായിരുന്ന സഹപ്രവർത്തകൻ നോമാൻ മിയയുടെ തോക്കിൽ നിന്നാണ് വെടിയുണ്ട ഉതിർന്നത്. സംഭവസ്ഥലത്തുണ്ടായിരുന്നവരുടെ മൊഴിപ്രകാരം, ഫാക്ടറി വളപ്പിലെ അൻസാർ ബാരക്കിൽ വിശ്രമിക്കുന്നതിനിടയിൽ നോമാൻ തമാശരൂപേണ ബജേന്ദ്രയ്ക്ക് നേരെ തോക്ക് ചൂണ്ടുകയും അബദ്ധത്തിൽ കാഞ്ചി വലിക്കുകയുമായിരുന്നു. ഇടത് തുടയിൽ വെടിയേറ്റ ബജേന്ദ്ര ബിശ്വാസ് രക്തം വാർന്ന് മരണപ്പെടുകയായിരുന്നു. സംഭവവുമായി ബന്ധപ്പെട്ട് പ്രതി നോമാൻ മിയയെ പോലീസ് അറസ്റ്റ് ചെയ്തിട്ടുണ്ട്.

മൈമെൻസിംഗ് ജില്ലയിൽ തന്നെ ഡിസംബർ 18-ന് ദീപു ചന്ദ്ര ദാസ് എന്ന യുവാവിനെ ഒരു സംഘം ആളുകൾ തല്ലിക്കൊല്ലുകയും മൃതദേഹം പൊതുസ്ഥലത്ത് വെച്ച് കത്തിക്കുകയും ചെയ്തിരുന്നു. ഈ സംഭവത്തിന്റെ ഞെട്ടൽ മാറുന്നതിന് മുൻപാണ് അതേ ജില്ലയിൽ തന്നെ മറ്റൊരു മരണം കൂടി സംഭവിക്കുന്നത്. ഇതിന് പുറമെ, കഴിഞ്ഞ ദിവസങ്ങളിൽ ധാക്കയിൽ അമൃത് മണ്ഡൽ എന്ന ഹിന്ദു യുവാവും വെടിയേറ്റ് കൊല്ലപ്പെട്ടിരുന്നു. ന്യൂനപക്ഷ വിഭാഗങ്ങൾക്കെതിരെ തുടർച്ചയായുണ്ടാകുന്ന ഇത്തരം അക്രമ സംഭവങ്ങളിൽ രാജ്യത്തിനകത്തും പുറത്തും വലിയ പ്രതിഷേധങ്ങളും ആശങ്കയും ഉയരുകയാണ്. എല്ലാ കേസുകളിലും സമഗ്രമായ അന്വേഷണം നടക്കുകയാണെന്ന് ബംഗ്ലാദേശ് പോലീസ് അറിയിച്ചു.