നന്ദി പ്രധാനമന്ത്രി! രാജ്യസഭ കാലാവധി പൂർത്തിയായി; കേന്ദ്ര സഹമന്ത്രി ജോർജ് കുര്യൻ രാജിവച്ചു

ദില്ലി: കേന്ദ്ര സഹമന്ത്രി ജോർജ് കുര്യൻ രാജിവെച്ചു. രാജ്യസഭയിലെ അദ്ദേഹത്തിന്റെ കാലാവധി അവസാനിച്ച സാഹചര്യത്തിലാണ് രാജി. രാഷ്ട്രപതി ദ്രൗപതി മുര്‍മു രാജി സ്വീകരിച്ചു. ‘പ്രധാനമന്ത്രിയുടെ ഉപദേശപ്രകാരം, ഭരണഘടനയുടെ ആർട്ടിക്കിൾ 75 ലെ വകുപ്പ് (2) പ്രകാരം, കേന്ദ്ര മന്ത്രി സഭയിൽ നിന്നുള്ള ജോർജ് കുര്യന്റെ രാജി രാഷ്ട്രപതി സ്വീകരിച്ചു എന്ന്‌ ‘രാഷ്ട്രപതി ഭവൻ പുറത്തിറക്കിയ പ്രസ്താവനയിൽ പറഞ്ഞു.

“ജൂൺ 21-ാം തീയതി എൻ്റെ രാജ്യസഭ കാലാവധി പൂർത്തിയായിരുന്നു. ബഹു. പ്രധാനമന്ത്രിയെ കാണാനുള്ള അവസരം ഇന്നലെ ( 22.06.2026) ആണ് കിട്ടിയത്. ഇന്നലെ തന്നെ രാജിക്കത്ത് നൽകി. കേന്ദ്രമന്ത്രി ആകുമെന്ന് സ്വപ്നത്തിൽ പോലും കരുതാത്ത എന്നെ മന്ത്രിയാക്കിയത് മോദിജി പ്രധാനമന്ത്രി ആയതുകൊണ്ട് മാത്രമാണ്. അതിന് അദ്ദേഹത്തോട് നന്ദി പറഞ്ഞു. ഇന്ന് (23.06.2026) ബഹു. രാഷ്ട്രപതി രാജി സ്വീകരിച്ചതായി അറിയിച്ചു.” എന്ന് ഫേസ്ബുക് കുറിപ്പും അദ്ദേഹം പങ്കുവെച്ചിട്ടുണ്ട്.

കേന്ദ്ര സഹ മന്ത്രിയായതിന് പിന്നാലെ 2024 ഓഗസ്റ്റിലാണ് അദ്ദേഹത്തെ രാജ്യസഭാംഗമായി തിരഞ്ഞെടുത്തത്. 2024 ജൂണ്‍ ഒമ്പതിനാണ് മൂന്നാം മോദി സര്‍ക്കാരില്‍ ന്യൂനപക്ഷം, ഫിഷറീസ്, മൃഗസംരക്ഷണം വകുപ്പ് സഹമന്ത്രിയായി ജോര്‍ജ് കുര്യന്‍ ചുമതലയേറ്റത്. മധ്യപ്രദേശിൽനിന്നുള്ള രാജ്യസഭാംഗമായിരുന്നു കുര്യൻ. ഈ മാസത്തോടെ അദ്ദേഹത്തിന്റെ കാലാവധി കഴിഞ്ഞു. ഇത്തവണ നിയമസഭാ തിരഞ്ഞെടുപ്പിൽ ജോർജ് കുര്യൻ കാഞ്ഞിരപ്പള്ളിയിൽനിന്ന് ജനവിധി തേടിയിരുന്നെങ്കിലും പരാജയപ്പെട്ടു. ബിജെപി സംസ്ഥാന ഉപാധ്യക്ഷന്‍, ദേശീയ നിര്‍വാഹക സമിതി അംഗം, കോര്‍ കമ്മിറ്റി അംഗം, പാര്‍ട്ടി വക്താവ് തുടങ്ങിയ നിലകളില്‍ പ്രവര്‍ത്തിച്ചിട്ടുണ്ട്.