ഇറാന് നേരെ അമേരിക്കൻ വ്യോമാക്രമണം ശക്തമാകുന്നു: പശ്ചിമേഷ്യയിൽ വീണ്ടും യുദ്ധഭീതി

ഇറാനിലെ സൈനിക കേന്ദ്രങ്ങൾ ലക്ഷ്യമിട്ട് വീണ്ടും ശക്തമായ വ്യോമാക്രമണം നടത്തി അമേരിക്ക. ജോർദാനിൽ രണ്ട് യുഎസ് സൈനികർ കൊല്ലപ്പെട്ട ഇറാൻ ആക്രമണത്തിന് മറുപടിയായാണ് യുഎസ് സെൻട്രൽ കമാൻഡ് പുതിയ തിരിച്ചടി ആരംഭിച്ചത്. ഇറാനെതിരെ തുടർച്ചയായ ഒൻപതാം ദിവസമാണ് അമേരിക്കൻ സൈന്യം ആക്രമണം കടുപ്പിക്കുന്നത്.
ഹോർമൂസ് കടലിടുക്കിലൂടെയുള്ള അന്താരാഷ്ട്ര വാണിജ്യ കപ്പൽ ഗതാഗതത്തിന് ഇറാൻ ഉയർത്തുന്ന ഭീഷണി പൂർണ്ണമായും ഇല്ലാതാക്കുകയാണ് ഈ നീക്കത്തിന് പിന്നിലെ പ്രധാന ലക്ഷ്യമെന്ന് യുഎസ് മിലിട്ടറി വ്യക്തമാക്കി. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ തീരദേശ നിരീക്ഷണ കേന്ദ്രങ്ങൾ, വ്യോമപ്രതിരോധ സംവിധാനങ്ങൾ, മിസൈൽ-ഡ്രോൺ സംഭരണ കേന്ദ്രങ്ങൾ, കമാൻഡ് സെന്ററുകൾ എന്നിവ കേന്ദ്രീകരിച്ചായിരുന്നു ആക്രമണം.

ഇതിനിടെ മേഖലയിലെ യുഎസ് സൈന്യത്തോട് ഉടൻ പിന്മാറാൻ ഇറാൻ മുന്നറിയിപ്പ് നൽകി. അമേരിക്കൻ കടന്നുകയറ്റത്തിന് ശക്തമായ മറുപടി നൽകുമെന്ന് ഇറാന്റെ ഉന്നത നേതാക്കളും വ്യക്തമാക്കിയിട്ടുണ്ട്. ഇരുരാജ്യങ്ങളും തമ്മിലുള്ള ആക്രമണം ശക്തമായതോടെ പശ്ചിമേഷ്യൻ മേഖല വീണ്ടും കടുത്ത യുദ്ധഭീതിയിലായിരിക്കുകയാണ്. ഇത് ആഗോള ഊർജ്ജ മേഖലയെയും എണ്ണ വിതരണത്തെയും ഗുരുതരമായി ബാധിച്ചേക്കുമെന്നാണ് വിലയിരുത്തപ്പെടുന്നത്.