എയർ ട്രാഫിക് കൺട്രോളർമാരാകാൻ ഗെയിമർമാരെ ക്ഷണിച്ച് അമേരിക്ക; പുതിയ റിക്രൂട്ട്‌മെന്റ് നയം പ്രഖ്യാപിച്ചു

വാഷിംഗ്ടൺ : വിമാനത്താവളങ്ങളിലെ സുരക്ഷാ ചുമതലയുള്ള എയർ ട്രാഫിക് കൺട്രോൾ വിഭാഗത്തിലേക്ക് ഗെയിമർമാരെ സ്വാഗതം ചെയ്ത് യുഎസ് ഫെഡറൽ ഏവിയേഷൻ അഡ്മിനിസ്ട്രേഷൻ (FAA). കൺട്രോളർമാരുടെ കടുത്ത ക്ഷാമം നേരിടുന്ന സാഹചര്യത്തിലാണ്, അതിവേഗത്തിൽ തീരുമാനങ്ങൾ എടുക്കാനും സാങ്കേതിക വിദ്യയിൽ പ്രാവീണ്യമുള്ളവരുമായ വീഡിയോ ഗെയിം പ്രേമികളെ ഈ തൊഴിലിലേക്ക് ആകർഷിക്കാൻ പദ്ധതിയിടുന്നത്.

വിമാനങ്ങൾ കൂട്ടിയിടിക്കാതെ നിയന്ത്രിക്കുക എന്ന അതീവ ഗൗരവകരമായ ചുമതലയാണ് എയർ ട്രാഫിക് കൺട്രോളർമാർക്കുള്ളത്. സമ്മർദ്ദഘട്ടങ്ങളിൽ പെട്ടെന്ന് തീരുമാനങ്ങൾ എടുക്കാനുള്ള കഴിവ് അത്യാവശ്യമായ ഈ ജോലിക്ക്, സമാനമായ സാഹചര്യങ്ങളിലൂടെ കടന്നുപോകുന്ന ഗെയിമർമാർ കൂടുതൽ അനുയോജ്യരാകുമെന്നാണ് വിലയിരുത്തൽ. നിലവിൽ 14,663 കൺട്രോളർമാർ വേണ്ട സ്ഥാനത്ത് ഏകദേശം 3,000 പേരുടെ കുറവുണ്ടെന്നാണ് എഫ്.എ.എ വ്യക്തമാക്കുന്നത്. വരും വർഷങ്ങളിൽ ഇത് ഇരട്ടിയാകാൻ സാധ്യതയുള്ളതിനാലാണ് പുതിയ റിക്രൂട്ട്‌മെന്റ് രീതികൾ പരീക്ഷിക്കുന്നത്.

ഗെയിമർമാരെ ഉൾപ്പെടുത്തി ഉദ്യോഗാർത്ഥികളുടെ എണ്ണം വർദ്ധിപ്പിക്കാനുള്ള നീക്കത്തെ എയർ ട്രാഫിക് കൺട്രോളർമാരുടെ യൂണിയനും സ്വാഗതം ചെയ്തു. കഠിനമായ പരിശീലനവും സുരക്ഷാ മാനദണ്ഡങ്ങളും ഉറപ്പാക്കി മാത്രമേ നിയമനം നടത്തുകയുള്ളൂവെന്നും എന്നാൽ കഴിവും വേഗവുമുള്ള പുതിയ തലമുറയെ ഈ രംഗത്തേക്ക് കൊണ്ടുവരുന്നത് ഗുണകരമാകുമെന്നും നാഷണൽ എയർ ട്രാഫിക് കൺട്രോളേഴ്സ് അസോസിയേഷൻ പ്രസിഡന്റ് നിക്ക് ഡാനിയൽസ് പറഞ്ഞു. അടുത്ത കാലത്തായി വിമാനങ്ങൾ തമ്മിൽ ആകാശത്ത് അപകടകരമായ രീതിയിൽ അടുത്തെത്തിയ സംഭവങ്ങൾ റിപ്പോർട്ട് ചെയ്ത പശ്ചാത്തലത്തിൽ, സുരക്ഷ വർദ്ധിപ്പിക്കുക എന്ന ലക്ഷ്യത്തോടെയാണ് ഈ അടിയന്തര നീക്കം.