രണ്‍ജീത്ത് വധം: ‘കേസ് അന്വേഷണത്തില്‍ സര്‍ക്കാറിനെ എസ് ഡി പി ഐ സ്വാധീനിച്ചു; പ്രതികള്‍ സംസ്ഥാനം വിട്ടത് സര്‍ക്കാറിന്റെ വീഴ്ച’ ; രൂക്ഷ വിമർശനവുമായി വി മുരളീധരന്‍

കൊച്ചി: ആലപ്പുഴ ബി ജെ പി (BJP) നേതാവ് രണ്‍ജീത്ത് കൊല്ലപ്പെട്ട കേസില്‍ പ്രതികള്‍ സംസ്ഥാനം വിട്ട് പോയത് സര്‍ക്കാറിന്റെ വീഴ്ച കാരണമാണെന്ന് കേന്ദ്രമന്ത്രി വി മുരളീധരന്‍. സിപിഎമ്മും എസ്ഡിപിഐയും തമ്മിലുള്ള ബന്ധം പ്രതികളെ സഹായിക്കുന്നതിലേക്ക് സ‍ർക്കാരിനെ നയിക്കുകയാണ്. കേസ് അന്വേഷണത്തിൽ സർക്കാരിനെ എസ്ഡിപിഐ സ്വാധീനിച്ചുവെന്നും വി മുരളീധരന്‍ വിമ‍ർശിച്ചു.

ക്രിമിനല്‍ പശ്ചാത്തലമുളളവരുടെ ലിസ്റ്റ് തയ്യാറാക്കാനുള്ള ഡിജിപിയുടെ നിര്‍ദേശം പക്ഷഭേദം കാണിക്കുന്നതാണ്. ക്രിമിനല്‍ സ്വഭാവുമുള്ള വ്യക്തികളുടെ ലിസ്റ്റ് എടുക്കുമ്ബോള്‍ പാര്‍ട്ടിയും കക്ഷിയും നോക്കാതെ പട്ടിക തയ്യാറാക്കണം. ഒരു സംഘടനയില്‍ പെട്ടു എന്നത് കൊണ്ട് ആര്‍ എസ് എസ്‌കാര്‍ ക്രിമിനല്‍ ലിസ്റ്റില്‍ പെടുമോ. രണ്‍ജീത്ത് വധക്കേസിലെ പ്രതികള്‍ കേരളം വിട്ടെന്ന് നേരത്തെ അന്വേഷണത്തിന് മേല്‍നോട്ടം വഹിക്കുന്ന എഡിജിപി വിജയ് സാഖറെ പറഞ്ഞിരുന്നു. കൊലപാതകം നടന്നതിന് പിന്നാലെ ആലപ്പുഴയില്‍ നിന്നും മറ്റുള്ള ജില്ലകള്‍ വഴി പ്രതികള്‍ രക്ഷപ്പെട്ടെന്ന വിവരം പോലീസിന്റെ ജാഗ്രതക്കുറവിലേക്ക് കൂടിയാണ് വിരല്‍ ചൂണ്ടുന്നതെന്നും അദ്ദേഹം കൂട്ടിച്ചേര്‍ത്തു.

അതേസമയം രൺജിത് വധക്കേസിൽ നിർണായക തെളിവുകൾ ലഭിച്ചതായി അന്വേഷണ സംഘം തലവൻ എഡിജിപി വിജയ് സാഖറെ. അന്വേഷണം ഏത് സംസ്ഥാനം കേന്ദ്രീകരിച്ചാണെന്ന് നടക്കുന്നതെന്ന സംബന്ധിച്ച വിവരങ്ങൾ ഇപ്പോൾ വെളിപ്പെടുത്താൻ കഴിയില്ല. രൺജീത്ത് വധക്കേസിൽ നിർണായകമായ വിവരങ്ങൾ ലഭിച്ചു കഴിഞ്ഞുവെന്നും എഡിജിപി വ്യക്തമാക്കി.