വടകര എംഡിഎംഎ കേസ്; ഒരു അദ്ധ്യാപിക കൂടി അറസ്റ്റിൽ; ഇൻസ്റ്റഗ്രാം വഴി ലക്ഷങ്ങളുടെ ലഹരി ഇടപാടെന്ന് പോലീസ്

വടകര: കോഴിക്കോട് വടകരയിൽ അദ്ധ്യാപികമാർ ഉൾപ്പെട്ട എംഡിഎംഎ ലഹരിക്കടത്ത് കേസിൽ ഒരു അദ്ധ്യാപിക കൂടി പോലീസിന്റെ പിടിയിലായി. പേരമ്പ്ര ബിആർസിയിലെ അധ്യാപികയായ കുട്ടോത്ത് സ്വദേശി വലിയ പറമ്പിൽ വി.പി. നീഷ്മയെയാണ് (30) പ്രത്യേക അന്വേഷണ സംഘം (SIT) അറസ്റ്റ് ചെയ്തത്. കേസിൽ മുൻപ് അറസ്റ്റിലായ കീർത്തന, കാവ്യ എന്നീ അധ്യാപികമാരെ ചോദ്യം ചെയ്തതിൽ നിന്നാണ് നീഷ്മയുടെ പങ്കിനെക്കുറിച്ചുള്ള നിർണ്ണായക വിവരങ്ങൾ പോലീസിന് ലഭിച്ചത്.

കേസിൽ കൂടുതൽ ആളുകൾ ഉൾപ്പെട്ടിട്ടുണ്ടെന്ന സംശയത്തെ തുടർന്ന് വടകര റൂറൽ എസ്പിയുടെ നേതൃത്വത്തിലാണ് പ്രത്യേക അന്വേഷണ സംഘത്തിന് രൂപം നൽകിയത്. പ്രതികൾ ഇൻസ്റ്റഗ്രാം പോലുള്ള സോഷ്യൽ മീഡിയ പ്ലാറ്റ്‌ഫോമുകൾ വഴിയാണ് വിദേശത്തും സ്വദേശത്തുമുള്ള ലഹരി മാഫിയകളുമായി ബന്ധം പുലർത്തിയിരുന്നതെന്ന് പോലീസ് കണ്ടെത്തി. ആവശ്യക്കാരെ നേരിട്ട് കാണാതെ ഓൺലൈൻ അക്കൗണ്ടുകൾ വഴിയായിരുന്നു ലക്ഷക്കണക്കിന് രൂപയുടെ എംഡിഎംഎ ഇടപാടുകൾ നടത്തിയിരുന്നത്. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടോ എന്ന് അന്വേഷിച്ചു വരികയാണെന്നും വരും ദിവസങ്ങളിൽ കൂടുതൽ അറസ്റ്റ് ഉണ്ടാകുമെന്നും പോലീസ് അറിയിച്ചു.