വാൽപ്പാറ ദുരന്തം! ഇൻഷുറൻസ് പരിരക്ഷയില്ലാത്ത അഞ്ച് പേരുടെ കുടുംബത്തിന് പത്ത് ലക്ഷം രൂപ വീതം ധനസഹായം നൽകും ;തീരുമാനം സംസ്ഥാന മന്ത്രിസഭാ യോഗത്തിൽ

മലപ്പുറം : കേരളത്തെ നടുക്കിയ വാൽപ്പാറ ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് പത്ത് ലക്ഷം രൂപ വീതം ധനസഹായം നൽകാൻ സംസ്ഥാന മന്ത്രിസഭാ യോഗം തീരുമാനിച്ചു. ഇൻഷുറൻസ് പരിരക്ഷ ലഭ്യമല്ലാത്ത അഞ്ച് പേരുടെ കുടുംബാംഗങ്ങൾക്കാണ് മുഖ്യമന്ത്രിയുടെ ദുരിതാശ്വാസ നിധിയിൽ നിന്നും ഈ തുക അനുവദിക്കുന്നത്. അപകടത്തിൽപ്പെട്ട അദ്ധ്യാപകർക്ക് ഇൻഷുറൻസ് പരിരക്ഷയുണ്ടെന്നും എന്നാൽ മറ്റ് ജീവനക്കാർക്കും വിദ്യാർത്ഥിക്കും അർഹമായ സഹായം ഉറപ്പാക്കുമെന്നും സർക്കാർ അറിയിച്ചു. സ്കൂൾ ബസ് ഡ്രൈവർ നൗഷാദ് അലി, പാചകത്തൊഴിലാളികളായ സാജിദ, റുഖിയ, ഷക്കീല, വിദ്യാർത്ഥിയായ മുഹമ്മദ് ഹിഷാം എന്നിവരുടെ കുടുംബങ്ങൾക്കാണ് ഈ ആശ്വാസധനം ലഭിക്കുക.

ദുരന്തത്തിൽ പരിക്കേറ്റ് ചികിത്സയിൽ കഴിയുന്നവർക്കും സർക്കാർ പൂർണ്ണ പിന്തുണ പ്രഖ്യാപിച്ചിട്ടുണ്ട്. അപകടത്തിൽപ്പെട്ട അദ്ധ്യാപികയുടെ മകൻ മുഹമ്മദ് ഷഹാദിൻ, മറ്റൊരു അദ്ധ്യാപികയുടെ മകൾ മസ്നീൻ, വാഹനത്തിന്‍റെ ഡ്രൈവർ മുഹമ്മദ് ഫാഹിസ് എന്നിവരുടെ ചികിത്സാ ചിലവുകൾ സർക്കാർ നേരിട്ട് വഹിക്കും. ഇൻഷുറൻസ് പരിരക്ഷയുള്ള വ്യക്തികൾക്ക്, ഇൻഷുറൻസ് തുകയ്ക്ക് പുറമെ ചികിത്സയ്ക്കായി അധികം തുക ചെലവായിട്ടുണ്ടെങ്കിൽ ആ തുകയും മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് അനുവദിക്കാനും മന്ത്രിസഭ തീരുമാനിച്ചു.

മറ്റ് ഭരണപരമായ തീരുമാനങ്ങളുടെ ഭാഗമായി, പന്ത്രണ്ടാം ശമ്പള കമ്മീഷൻ്റെ പ്രവർത്തനം സുഗമമാക്കുന്നതിനായി 14 അധിക തസ്‌തികകൾ സൃഷ്ടിച്ചുകൊണ്ട് നേരത്തെ പുറപ്പെടുവിച്ച ഉത്തരവിന് മന്ത്രിസഭ സാധൂകരണം നൽകി. ദുരന്തബാധിതർക്ക് എത്രയും വേഗം സഹായം ലഭ്യമാക്കുന്നതിനായുള്ള നടപടികൾ വേഗത്തിലാക്കാൻ ബന്ധപ്പെട്ട വകുപ്പുകൾക്ക് നിർദ്ദേശം നൽകിയിട്ടുണ്ട്. ദുരന്തത്തിൻ്റെ ആഘാതത്തിൽ കഴിയുന്ന കുടുംബങ്ങൾക്ക് സർക്കാരിന്റെ ഈ തീരുമാനം വലിയൊരു ആശ്വാസമാകും.