കണ്ണില്ലാ ക്രൂരത !കൊല്ലത്ത് മോഷണക്കുറ്റം ആരോപിച്ച് ആറാം ക്‌ളാസുകാരനെ തലകീഴായി കെട്ടിത്തൂക്കാൻ ശ്രമം ! 2 പേർ കസ്റ്റഡിയിൽ

കൊല്ലം പുനലൂരിൽ ആറാം ക്ലാസ് വിദ്യാർത്ഥികളായ സഹോദരങ്ങളെ ഹോസ്റ്റലിൽ വെച്ച് ക്രൂരമായി മർദിച്ച സംഭവത്തിൽ പോലീസ് അന്വേഷണം ഊർജിതമാക്കി. പുനലൂരിലെ ‘ലിവിങ് വാട്ടർ’ എന്ന സ്വകാര്യ സ്ഥാപനത്തിലെ വാർഡനും പാചകക്കാരനുമാണ് കുട്ടികളെ അതിക്രൂരമായ ശാരീരിക പീഡനത്തിന് ഇരയാക്കിയത്. പണം മോഷ്ടിച്ചുവെന്നാരോപിച്ച് കുട്ടികളുടെ കാലിൽ കയർ കെട്ടി തലകീഴായി തൂക്കിയായിരുന്നു മർദനമെന്നാണ് രക്ഷിതാക്കളുടെ പരാതിയിൽ പറയുന്നത്.

കഴിഞ്ഞ വ്യാഴാഴ്ചയാണ് മനഃസാക്ഷിയെ ഞെട്ടിച്ച ഈ സംഭവം നടന്നത്. അവധിക്കാലമായതിനാൽ ഹോസ്റ്റലിലെ ഭൂരിഭാഗം കുട്ടികളും വീട്ടിലേക്ക് മടങ്ങിയിരുന്നു. ബാക്കിയുണ്ടായിരുന്ന മൂന്ന് കുട്ടികളിൽ സഹോദരങ്ങളായ രണ്ടുപേരെയാണ് അധികൃതർ ക്രൂരമായി ഉപദ്രവിച്ചത്. പാചകക്കാരന്റെ കൈവശമുണ്ടായിരുന്ന അഞ്ഞൂറ് രൂപ കാണാതായതാണ് പ്രകോപനത്തിന് കാരണമായത്. ആറാം ക്ലാസുകാരനായ വിദ്യാർത്ഥിയാണ് പണമെടുത്തതെന്ന് ആരോപിച്ച് വാർഡനും പാചകക്കാരനും ചേർന്ന് കുട്ടിയെ ചോദ്യം ചെയ്യുകയും ശിക്ഷാനടപടി എന്ന നിലയിൽ കെട്ടിത്തൂക്കി മർദിക്കുകയുമായിരുന്നു.

മർദനത്തിന് ശേഷം അധികൃതർ രക്ഷിതാക്കളെ വിളിച്ച് വരുത്തി കുട്ടിയെ വീട്ടിലേക്ക് പറഞ്ഞുവിട്ടു. വീട്ടിലെത്തിയ കുട്ടിയുടെ ശരീരത്തിലെ പാടുകൾ ശ്രദ്ധയിൽപ്പെട്ടതോടെയാണ് വിവരം പുറത്തറിയുന്നത്. തുടർന്ന് കുട്ടി തന്നെ നേരിട്ട ക്രൂരതകൾ വീട്ടുകാരോട് വിവരിക്കുകയായിരുന്നു. ഉടനടി രക്ഷിതാക്കൾ പുനലൂർ പോലീസിൽ പരാതി നൽകുകയും കുട്ടിയെ പുനലൂർ താലൂക്ക് ആശുപത്രിയിൽ എത്തിച്ച് വൈദ്യപരിശോധനയ്ക്ക് വിധേയനാക്കുകയും ചെയ്തു. സംഭവത്തിന്റെ ഗൗരവം കണക്കിലെടുത്ത് ജുവനൈൽ ജസ്റ്റിസ് ആക്ട് പ്രകാരവും ഭാരതീയ ന്യായ സംഹിതയിലെ (BNS) വിവിധ വകുപ്പുകൾ പ്രകാരവുമാണ് പ്രതികൾക്കെതിരെ കേസെടുത്തിരിക്കുന്നത്. സ്ഥാപനത്തിന്റെ പ്രവർത്തനങ്ങളെക്കുറിച്ചും കുട്ടികളുടെ സുരക്ഷാ മാനദണ്ഡങ്ങളെക്കുറിച്ചും പോലീസ് വിശദമായ പരിശോധന ആരംഭിച്ചിട്ടുണ്ട്.