വാരാണസി പ്രചാരണ ചൂടിലേക്ക് ! മോദിയുടെ മണ്ഡലത്തിൽ പത്രിക സമർപ്പിച്ചത് 42 പേർ! ഭൂരിപക്ഷം വർദ്ധിക്കുമെന്ന് ബിജെപി; മോദി ഇന്ന് വീണ്ടും വാരാണസിയിൽ

കാശി: പത്രികാ സമർപ്പണത്തിന്റെ അവസാന ദിനവും കടന്നുപോകുമ്പോൾ പ്രചാരണ ചൂടിലേക്ക് കടന്ന് വാരാണസി. പ്രധാനമന്ത്രി നരേന്ദ്രമോദിയുടെ മണ്ഡലം എന്ന നിലയിൽ വാരാണസിയിലെ പോരാട്ടം ലോക ശ്രദ്ധയാകർഷിക്കുകയാണ്. രാജ്യത്ത് ഏറ്റവും അധികം സ്ഥാനാർത്ഥികൾ രംഗത്തുള്ള മണ്ഡലങ്ങളിൽ ഒന്നാണ് വാരാണസി. 42 സ്ഥാനാർത്ഥികളാണ് പത്രിക സമർപ്പിച്ചിട്ടുള്ളത്. 17 നാണ് സൂക്ഷ്‌മ പരിശോധന. പ്രധാനമന്ത്രി നരേന്ദ്രമോദി ഇന്നലെ പത്രിക സമർപ്പിച്ചിരുന്നു. ഇൻഡി മുന്നണിയുടെ അജയ് റായിയും ബി എസ് പി യുടെ ആധാർ ജമാൽ ലാരിയുമാണ് പ്രധാന എതിരാളികൾ. മറ്റുള്ളവർ ചെറു പാർട്ടികളെ പ്രതിനിധീകരിക്കുന്നവരും സ്വതന്ത്രരും ഡമ്മി സ്ഥാനാർത്ഥികളുമാണ്.

ഇന്നലെയാണ് 18 കേന്ദ്ര മന്ത്രിമാരുടെയും 12 മുഖ്യമന്ത്രിമാരുടെയും സാന്നിധ്യത്തിൽ പ്രധാനമന്ത്രി നരേന്ദ്രമോദി പത്രിക സമർപ്പിച്ചത്. എല്ലാ സംസ്ഥാനങ്ങളിലെയും എൻ ഡി എ നേതാക്കന്മാർ പത്രികാ സമർപ്പണത്തിന് എത്തിയിരുന്നു. കഴിഞ്ഞ പത്തുവർഷമായി മണ്ഡലത്തിൽ നടക്കുന്ന വികസന പ്രവർത്തനങ്ങൾക്ക് രാജ്യത്ത് തന്നെ സമാനതകളില്ല. ഗംഗയുടെ വിശുദ്ധി തിരികെ കൊണ്ടുവരുന്നതിൽ പ്രധാനമന്ത്രി നരേന്ദ്രമോദി വിജയിച്ചതായി വോട്ടർമാർ വിശ്വസിക്കുന്നു. ക്ഷേത്രനഗരിയുടെ ഉയർത്തെഴുന്നേൽപ്പിനായിരുന്നു കഴിഞ്ഞ ഒരു പതിറ്റാണ്ടുകൊണ്ട് രാജ്യം സാക്ഷ്യം വഹിച്ചത്.

അതേസമയം രണ്ടു ദിവസത്തെ സന്ദർശനത്തിന് ശേഷം മടങ്ങിയ നരേന്ദ്രമോദി ഇന്ന് വൈകുന്നേരം വീണ്ടും മണ്ഡലത്തിലെത്തും. നാളെ വനിതാ പ്രവർത്തകരുടെ യോഗത്തെ അദ്ദേഹം അഭിസംബോധന ചെയ്യും. വികസന പ്രവർത്തനങ്ങൾ മുൻനിർത്തിയുള്ള പ്രചാരണത്തിൽ ശ്രദ്ധിക്കുകയാണ് ബിജെപി. ഇത് മൂന്നാം തവണയാണ് മോദി വാരാണസിയിൽ നിന്ന് ജനവിധി തേടുന്നത്