”പരസ്പരം ബഹുമാനിക്കുന്ന വളരെ ശക്തരായ നേതാക്കൾ”; പ്രധാനമന്ത്രി നരേന്ദ്രമോദിയുമായുള്ളത് മികച്ച സൗഹൃദമെന്ന് ട്രംപിന്റെ അടുത്ത സഹായി

ന്യൂയോർക്ക്: പ്രധാനമന്ത്രി നരേന്ദ്രമോദിയും മുൻ യുഎസ് പ്രസിഡന്റ് ഡോണൾഡ് ട്രംപും പരസ്പരം ബഹുമാനിക്കുന്ന വളരെ ശക്തരായ നേതാക്കളാണെന്ന പ്രശംസയുമായി ട്രംപിന്റെ അടുത്ത സഹായിയും സംരംഭകനുമായ അൽ മേസൻ. ഈ ആഴ്ച ന്യൂയോർക്കിൽ ക്വാഡ് സമ്മേളനത്തിനായി എത്തുന്ന പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തുമെന്ന് ട്രംപ് പ്രഖ്യാപിച്ചിരുന്നു. ഇതിന് പിന്നാലെയാണ് അൽ മേസന്റെ പ്രതികരണം.

നടക്കാനിരിക്കുന്ന കൂടിക്കാഴ്ചയിലൂടെ ഇരു നേതാക്കളും തമ്മിലുള്ള ബന്ധം കൂടുതൽ ശക്തിപ്പെടുമെന്നും അൽ മേസൻ പറയുന്നു.”നല്ലൊരു സൗഹൃദം പങ്കിട്ടിരുന്നവരാണ് ട്രംപും പ്രധാനമന്ത്രി നരേന്ദ്രമോദിയും. മോദിയെ ശക്തമായി പിന്തുണയ്‌ക്കുന്നവരാണ് ഇന്ത്യൻ-അമേരിക്കൻ സമൂഹം. അധികാരത്തിൽ ഇരുന്ന സമയത്ത് ഇരുവരും തമ്മിൽ നല്ലൊരു ബന്ധമാണ് ഉണ്ടായിരുന്നത്. പരസ്പരം ബഹുമാനിക്കുന്ന ശക്തരായ രണ്ട് നേതാക്കൾ. ഇരുരാജ്യങ്ങളും തമ്മിലുളള ബന്ധം ശക്തിപ്പെടുത്തുന്നതിൽ നിന്നും വ്യക്തിപരമായ ബന്ധത്തിലേക്ക് അവർ തമ്മിലുള്ള ഇടപഴലുകൾ നീളുകയായിരുന്നു.

മുൻപ് ഇന്ത്യയും അമേരിക്കയും തമ്മിലുള്ള ബന്ധം അത്ര ദൃഢമായിരുന്നില്ല. എന്നാൽ ഇന്ന് ഇരു രാജ്യങ്ങളും തമ്മിലുള്ള ബന്ധം കൂടുതൽ മെച്ചപ്പെട്ടുവെന്നതിൽ ട്രംപിനും വലിയൊരു പങ്കുണ്ട്. ഇന്ത്യയിലെ അമേരിക്കക്കാർക്ക് ഒരുപക്ഷേ ഇത് വളരെ പെട്ടന്നെ മനസിലാകും. കാരണം ആദ്യമായിട്ടാകും ഒരു യുഎസ് പ്രസിഡന്റ് അവർക്ക് അംഗീകാരവും ബഹുമാനവും നൽകുന്നത്. പല വിഷയങ്ങളിലും അമേരിക്കയിലെ ഇന്ത്യൻ സമൂഹം ഇത് തിരിച്ചറിയുന്നുണ്ട്. വരുന്ന പ്രസിഡന്റ് തെരഞ്ഞെടുപ്പിലും അവർ നിർണായകമായ പങ്കുവഹിക്കുന്നുണ്ടെന്നും” അൽ മേസൻ പറയുന്നു.