ഹിന്ദുക്കളെ കൊല്ലുമെന്ന് ഭീഷണിപ്പെടുത്തുന്നു .. പലായനം ചെയ്യാൻ നിർബന്ധിക്കുന്നു .. കലാപകാരികൾ അഴിഞ്ഞാടുന്ന ബംഗ്ലാദേശിലെ ന്യൂനപക്ഷങ്ങളുടെ ദുരവസ്ഥ വ്യക്തമാക്കുന്ന ബംഗ്ലാദേശ് ഹിന്ദു യുവതിയുടെ വീഡിയോ ദൃശ്യങ്ങൾ പുറത്ത്

സർക്കാർ വിരുദ്ധ പ്രക്ഷോഭത്തെത്തുടർന്ന് രാജിവച്ച പ്രധാനമന്ത്രി ഷെയ്ഖ് ഹസീന രാജ്യം വിട്ടതോടെ
കലാപകാരികൾ അഴിഞ്ഞാടുന്ന ബംഗ്ലാദേശിലെ ന്യൂനപക്ഷങ്ങളുടെ ദുരവസ്ഥ വ്യക്തമാക്കുന്ന വീഡിയോ ദൃശ്യങ്ങൾ പുറത്തു വന്നു. ഒരു ബംഗ്ലാദേശി ഹിന്ദു സ്ത്രീ തങ്ങളെ രക്ഷിക്കണമെന്ന് അഭ്യർത്ഥിക്കുന്ന വീഡിയോയാണ് പുറത്തു വന്നിരിക്കുന്നത്.

കലാപകാരികൾ തൻ്റെ വീട് നശിപ്പിക്കുന്നതും കുടുംബം ഇന്ത്യയിലേക്ക് പലായനം ചെയ്യണമെന്ന് ആവശ്യപ്പെട്ട് വധഭീഷണി നേരിടുന്നതും യുവതി കരഞ്ഞുകൊണ്ടാണ് പറയുന്നത്.

“കലാപകാരികൾ എൻ്റെ വീട് തകർത്തു. എനിക്കും എൻ്റെ കുടുംബത്തിനും നേരെ വധഭീഷണി ഉയർത്തി, ബംഗ്ലാദേശ് വിട്ട് ഇന്ത്യയിലേക്ക് പലായനം ചെയ്യാനാണ് അവർ ആവശ്യപ്പെടുന്നത്. ഞങ്ങൾ ബംഗ്ലാദേശ് പൗരന്മാരല്ലേ ? ഞങ്ങൾക്ക് ഇവിടെ ജീവിക്കാൻ സ്വാതന്ത്ര്യമില്ലേ? ഞാനും എൻ്റെ കുടുംബവും ഇന്ത്യയിൽ അഭയം തേടേണ്ടതുണ്ടോ?”- യുവതി വികാരഭരിതയായി പറഞ്ഞു.

പ്രധാനമന്ത്രി ഷെയ്ഖ് ഹസീനയുടെ രാജിയെ തുടർന്നുള്ള അധികാര ശൂന്യത മുതലെടുത്ത ഇസ്‌ലാമിസ്റ്റ് – തീവ്രവാദ ഗ്രൂപ്പുകൾ ഹിന്ദു ന്യൂനപക്ഷങ്ങൾക്കെതിരായ അവരുടെ ആക്രമണങ്ങൾ വർദ്ധിപ്പിച്ചിരിക്കുകയാണ്. വീടുകൾ കത്തിക്കുന്നതും സ്ത്രീകളെ തട്ടിക്കൊണ്ടുപോകുന്നതും വ്യാപകമായി റിപ്പോർട്ട് ചെയ്യപ്പെടുന്നുണ്ട്.

ഇന്നലെ അക്രമ സംഭവങ്ങളിൽ കൊല്ലപ്പെട്ട 100 പേരിൽ ഒരു ഹിന്ദു കൗൺസിലറും ഉൾപ്പെട്ടിരുന്നു.റിപ്പോർട്ടുകൾ പ്രകാരം കാളി ക്ഷേത്രങ്ങൾ ഉൾപ്പെടെയുള്ള ഹിന്ദുക്കളുടെ ആരാധനാലയങ്ങളും ക്ഷേത്രങ്ങളും കലാപകാരികൾ ലക്ഷ്യമിടുകയാണ്. ഹരേകൃഷ്ണ പ്രസ്ഥാനം അല്ലെങ്കിൽ ഇസ്കോൺ എന്നറിയപ്പെടുന്ന അന്താരാഷ്ട്ര കൃഷ്ണാവബോധ സമിതിയുടെ ക്ഷേത്രങ്ങളും ആക്രമിക്കപ്പെട്ടിട്ടുണ്ട്. ബംഗ്ലാദേശ് സേന കലാപകാരികളെ ഫലപ്രഥമായി നേരിടാത്തതിനാൽ വംശഹത്യയിലേക്ക് കാര്യങ്ങളെത്തുമോ എന്ന ഭയപ്പാടിലാണ് രാജ്യത്തെ ന്യൂന പക്ഷങ്ങൾ.