അനുഗ്രഹം തേടി മണ്ണാറശാലയിൽ വിസ്മയയും സുചിത്രയും; ‘തുടക്കം’ നാളെ മുതൽ തിയറ്ററുകളിൽ

കൊച്ചി: അരങ്ങേറ്റ ചിത്രമായ ‘തുടക്കം’ റിലീസിന് ഒരുങ്ങുന്നതിനിടെ നടി വിസ്മയ മോഹൻലാൽ അമ്മ സുചിത്ര മോഹൻലാലിനൊപ്പം ആലപ്പുഴ ഹരിപ്പാടുള്ള പ്രശസ്ത മണ്ണാറശാല നാഗാരാജ ക്ഷേത്രത്തിൽ ദർശനം നടത്തി. ഓഗസ്റ്റ് 7-ന് ചിത്രം തിയറ്ററുകളിൽ എത്താനിരിക്കെയാണ് ഇരുവരും ക്ഷേത്രത്തിലെത്തി അനുഗ്രഹം തേടിയത്. ക്ഷേത്രദർശനത്തിന്റെ വീഡിയോ ഇതിനകം സോഷ്യൽ മീഡിയയിൽ വൈറലായിട്ടുണ്ട്. നിരവധി ആരാധകരാണ് വിസ്മയയ്ക്കും ചിത്രത്തിനും ആശംസകളുമായി രംഗത്തെത്തുന്നത്.

ജൂഡ് ആന്തണി ജോസഫ് സംവിധാനം ചെയ്യുന്ന ‘തുടക്കം’ ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രമാണ്. ‘2018’ എന്ന വമ്പൻ വിജയചിത്രത്തിന് ശേഷം ജൂഡ് സംവിധാനം ചെയ്യുന്ന സിനിമയെന്ന പ്രത്യേകതയും ഈ പ്രോജക്ടിനുണ്ട്. ചിത്രത്തിൽ ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും പ്രധാന കഥാപാത്രത്തെ അവതരിപ്പിക്കുന്നുണ്ട്. അതേസമയം, മോഹൻലാലും ചിത്രത്തിൽ അതിഥി വേഷത്തിൽ എത്തുന്നുവെന്നത് ആരാധകരുടെ പ്രതീക്ഷ വർധിപ്പിക്കുന്ന ഘടകമാണ്.

ചിത്രത്തിന്റെ ഫസ്റ്റ് ലുക്ക് പോസ്റ്റർ നേരത്തെ തന്നെ ശ്രദ്ധ നേടിയിരുന്നു. ലോഞ്ചിംഗ് ചടങ്ങിൽ ചിത്രം “ഒരു കൊച്ചു കുടുംബചിത്രം” ആണെന്ന് സംവിധായകൻ ജൂഡ് ആന്തണി ജോസഫ് വ്യക്തമാക്കിയിരുന്നെങ്കിലും, അതിലപ്പുറമുള്ള സർപ്രൈസുകൾ സിനിമയിൽ ഉണ്ടാകുമെന്നാണ് പ്രേക്ഷകർ പ്രതീക്ഷിക്കുന്നത്.

യു/എ 16 പ്ലസ് സർട്ടിഫിക്കറ്റ് നേടിയ ചിത്രത്തിന്റെ ദൈർഘ്യം 2 മണിക്കൂർ 19 മിനിറ്റാണ്. ഡോ. എമിൽ ആന്റണിയും ഡോ. അനീഷ ആന്റണിയുമാണ് എക്സിക്യൂട്ടീവ് പ്രൊഡ്യൂസർമാർ.

ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്തണി ജോസഫ് എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. സംഗീതം ജേക്സ് ബിജോയ്, ഛായാഗ്രഹണം ജോമോൻ ടി. ജോൺ, എഡിറ്റിംഗ് ചമൻ ചാക്കോ, പ്രൊഡക്ഷൻ ഡിസൈൻ സന്തോഷ് രാമൻ എന്നിവരാണ് നിർവഹിച്ചിരിക്കുന്നത്. മേക്കപ്പ് ജിതേഷ് പൊയ്യ, കോസ്റ്റ്യൂം ഡിസൈൻ അരുൺ മനോഹർ, ചീഫ് അസോസിയേറ്റ് ഡയറക്ടർ സൈലക്സ് ഏബ്രഹാം, ഫിനാൻസ് കൺട്രോളർ മനോഹരൻ കെ. പയ്യന്നൂർ, പ്രൊഡക്ഷൻ എക്സിക്യൂട്ടീവ്സ് വിനോദ് ശേഖർ, ശ്രീക്കുട്ടൻ, പ്രൊഡക്ഷൻ കൺട്രോളർ ബിജു തോമസ് എന്നിവരാണ് ചിത്രത്തിന്റെ അണിയറ പ്രവർത്തകർ.

ഓഗസ്റ്റ് 7 മുതൽ തിയറ്ററുകളിലെത്തുന്ന ‘തുടക്കം’ വിസ്മയ മോഹൻലാലിന്റെ അഭിനയജീവിതത്തിലെ ആദ്യ അധ്യായത്തിന് തുടക്കമിടുന്ന ചിത്രമായതിനാൽ സിനിമാപ്രേമികളും ആരാധകരും വലിയ പ്രതീക്ഷയോടെയാണ് റിലീസിനെ കാത്തിരിക്കുന്നത്.