വിഴിഞ്ഞം തീരത്ത് ആയുധങ്ങളും ലഹരിമരുന്നുകളും കണ്ടെത്തിയ സംഭവം; തമിഴ്നാട്ടിൽ 25 കേന്ദ്രങ്ങളിൽ എൻഐഎ റെയ്ഡ് നടത്തി

ചെന്നൈ: വിഴിഞ്ഞം തീരത്ത് കഴിഞ്ഞ വർഷം എകെ 47 തോ ക്കുകളടക്കമുള്ള വൻ ആയുധ ശേഖരണങ്ങളും ലഹരിമരുന്നുമായി ശ്രീലങ്കൻ ബോട്ടുകൾ പിടിയിലായ കേസിൽ അന്വേഷണത്തിന്റെ ഭാഗമായി തമിഴ്നാട്ടിലെ 25 കേന്ദ്രങ്ങളിൽ എൻഐഎ റെയ്ഡ് നടത്തി. ചെന്നൈയിലെ മണ്ണടി, പല്ലാവരം, കോംപെട്ട് തുടങ്ങി 9 സ്ഥലങ്ങളിലും കൂടാതെ തിരുച്ചിറപ്പള്ളിയിൽ 11 ഇടങ്ങളിലുമായിരുന്നു പരിശോധന.

എൻഐഎയുടെ ചെന്നൈ, കൊച്ചി യൂണിറ്റുകളിലെ ഉദ്യോഗസ്ഥരുടെ നേതൃത്വത്തിലാണ് പരിശോധന നടത്തിയത്. തിരുച്ചിറപ്പള്ളിയിൽ വിദേശ കുറ്റവാളികളെ പാർപ്പിക്കുന്ന കേന്ദ്രത്തിലെ അന്തേവാസികളെ അന്വേഷണ സംഘം ചോദ്യം ചെയ്തിരുന്നു. തുടർന്ന് അന്വേഷണ സംഘം ഇവർക്കു പാസ്പോർട്ട് സംഘടിപ്പിച്ചവരെക്കുറിച്ചുള്ള വിവരങ്ങളും ചോദിച്ചറിഞ്ഞു.

കഴിഞ്ഞ വർഷം മാർച്ച് 18നാണ് വിഴിഞ്ഞം തീരത്ത് 3 മീൻപിടിത്ത ബോട്ടുകൾ കോസ്റ്റ് ഗാർഡ് പിടികൂടിയത്. 5 എകെ 47 തോക്കുകളും 1000 വെടിയുണ്ടകളും രാജ്യാന്തര വിപണിയിൽ 3000 കോടി വിലവരുന്ന 300 കിലോ ഹെറോയിനുമാണു ബോട്ടുകളിൽ നിന്നും പിടിച്ചെടുത്തത്. ബോട്ടിലുണ്ടായിരുന്ന 19 പേരെ അറസ്റ്റ് ചെയ്തിരുന്നു. കേസ് പിന്നീട് ദേശീയ അന്വേഷണ ഏജൻസി (എൻഐഎ) ഏറ്റെടുക്കുകയായിരുന്നു.