വ്യാജ ആരോപണങ്ങള്‍ ഉന്നയിച്ച നഗരസഭ പ്രതിപക്ഷ നേതാവ് ദീപക്കിനെതിരെ മാനനഷ്ട കേസ് ഫയല്‍ ചെയ്ത് തിരുവനന്തപുരം മേയര്‍ വി വി രാജേഷ്

തിരുവനന്തപുരം : കൗണ്‍സില്‍ യോഗങ്ങളില്‍ വ്യാജ ഒപ്പിട്ടെന്ന വ്യാജ ആരോപണം ഉന്നയിച്ച് വ്യക്തിഹത്യ നടത്താന്‍ ശ്രമിച്ചെന്നു കാട്ടി ദീപക് എസ്.പിക്ക് അഡ്വക്കേറ്റ് സെന്തില്‍ കുമാര്‍ എസ്. മുഖേന മേയര്‍ വി.വി. രാജേഷ് വക്കീല്‍ നോട്ടീസ് അയച്ചു. 5 കോടി രൂപ നഷ്ടപരിഹാരം ആവശ്യപ്പെട്ടാണ് നോട്ടീസ് അയച്ചിരിക്കുന്നത്. കൗണ്‍സിലര്‍ സുഗതന്‍ പങ്കെടുക്കാതിരുന്ന ഫെബ്രുവരി 26, മാര്‍ച്ച് 11, ഏപ്രില്‍ 27 തീയതികളിലെ തിരുവനന്തപുരം കോര്‍പ്പറേഷന്‍ കൗണ്‍സില്‍ യോഗങ്ങളില്‍ മേയറുടെ ഓഫീസിന്റെ അറിവോടെ വ്യാജ ഒപ്പിട്ടു എന്നായിരുന്നു ഒക്ടോബര്‍ 4-ന് ദീപക് വാര്‍ത്താസമ്മേളനത്തില്‍ ആരോപിച്ചത്.

കൂടാതെ, വിവരവകാശ നിയമപ്രകാരം ഹാജര്‍ രജിസ്റ്റര്‍ പരിശോധിച്ച ശേഷമാണ് ഇക്കാര്യം കണ്ടെത്തിയതെന്നും അദ്ദേഹം അവകാശപ്പെട്ടിരുന്നു. എന്നാല്‍, ഈ ആരോപണം തികച്ചും അടിസ്ഥാനരഹിതവും രാഷ്ട്രീയ ദുര്‍ലാക്കോടെയുള്ളതുമാണെന്ന് വക്കീല്‍ നോട്ടീസില്‍ വ്യക്തമാക്കുന്നു. മേയര്‍ എന്ന നിലയില്‍ വി.വി. രാജേഷിന്റെയും കോര്‍പ്പറേഷന്റെയും പ്രതിച്ഛായ തകര്‍ക്കാനും, നടപ്പിലാക്കിവരുന്ന വികസന പ്രവര്‍ത്തനങ്ങളെ തടസ്സപ്പെടുത്താനുമാണ് ഇത്തരം അപകീര്‍ത്തികരമായ പ്രചാരണങ്ങളെന്നും നോട്ടിസിലുണ്ട്.

നോട്ടീസ് ലഭിച്ച് 15 ദിവസത്തിനകം 5 കോടി രൂപ നഷ്ടപരിഹാരം നല്‍കി പരസ്യമായി മാപ്പ് പറയണമെന്നും, അല്ലാത്തപക്ഷം ദീപക് എസ്.പിക്കെതിരെ ശക്തമായ സിവില്‍, ക്രിമിനല്‍ നിയമനടപടികളുമായി മുന്നോട്ടുപോകുമെന്നും വക്കീല്‍ നോട്ടീസില്‍ മുന്നറിയിപ്പ് നല്‍കുന്നു.