സമരത്തിനിറങ്ങി വാച്ചർമാർ; ജീവൻപണയപ്പെടുത്തി പണി എടുത്തിട്ടും അർഹമായ ശമ്പളമില്ല

വയനാട്: വന്യമൃഗങ്ങളെ ജീവൻ പണയംവച്ച് തുരത്തിയിട്ടും അർഹമായ ശമ്പളം ലഭിക്കാത്തതിനെത്തുടർന്നു സമരത്തിനിറങ്ങിയിരിക്കുകയാണ് വയനാട്ടിലെ വനം വകുപ്പ് താൽകാലിക വാച്ചർമാർ.സ്വന്തം ജീവൻ പോലും അപായപ്പെടുത്തി ചെയ്യുന്ന ജോലിക്കു കിട്ടുന്നത് വെറും പതിനാലായിരത്തോളം രൂപ മാത്രമാണ്,ഇതിനെതിരെ പ്രതിഷേധിച്ചാണ് 12 താത്കാലിക വാച്ചർമാർ രംഗത്ത് വന്നിരിക്കുന്നത്. കാട്ടാനയെ ഉൾപ്പടെ ഓടിക്കാൻ ആവശ്യമായ സംവിധാനങ്ങൾ ഉറപ്പുവരുത്തണമെന്നും അർഹമായ ശമ്പളം നൽകാതെ വനം വകുപ്പ് അവഗണിക്കുന്നുവെന്നുമാണ്‌ പരാതി.

ശമ്പള വർധന അംഗീകരിച്ചില്ലെങ്കിൽ സമരത്തിലേക്ക് കടക്കാനാണ് വാച്ചർമാരുടെ തീരുമാനം.
കുറിച്യാട് റെയിഞ്ചിലെ കുപ്പാടി ഫോറസ്റ്റ് സ്‌റ്റേഷൻ പരിധിയിലുള്ള 12 താൽക്കാലിക വാച്ചർമാരാണ് പ്രതിഷേധവുമായി മുന്നോട്ട് വന്നിരിക്കുന്നത്.

അപകടസാധ്യത ഏറെയുളള ജോലിചെയ്യുന്ന വാച്ചർമാർക്ക് ദൗത്യങ്ങൾക്കിടെ പരുക്ക് പറ്റുന്നത് പതിവാണ്. രാത്രികാലങ്ങളിൽ ആനയെ ഓടിക്കാനുള്ള ടോർച്ച് പോലും സ്വന്തം പോക്കറ്റിൽ നിന്നും പണംമുടക്കിയാണ് വാങ്ങുന്നതെന്നും വാച്ചർമാർ പറയുന്നു.എന്നിട്ടും അർഹിച്ച ശമ്പളം കിട്ടാൻ ശബ്ദം ഉയർത്തേണ്ടി വരുന്ന അവസ്ഥയാണ് വനം വകുപ്പിന്റെ വാച്ചർമാർക്ക്.