ഭൂമിയേറ്റെടുക്കൽ നിയമക്കുരുക്കിൽ, പ്രഖ്യാപിക്കപ്പെട്ട സഹായങ്ങൾ പാഴ്‌വാക്കായി, പുനരധിവാസം വൈകുന്നതിനെതിരെ വയനാട് ദുരിത ബാധിതർ സമരത്തിലേക്ക്

വയനാട്: ചൂരൽമല ഉരുൾപൊട്ടൽ ദുരന്തത്തിൽപ്പെട്ടവർക്കുള്ള പുനരധിവാസ പദ്ധതികൾക്ക് സർക്കാർ സഹായം വൈകുന്നതിനെ തുടർന്ന് ദുരന്തബാധിതർ സമരത്തിനിറങ്ങാൻ തീരുമാനിച്ചു. സഹായങ്ങൾ കിട്ടാത്തതിനെ തുടർന്ന്, ഇവർ ‘ജനശബ്ദം ആക്ഷൻ കമ്മിറ്റി’ എന്നൊരു കൂട്ടായ്മ രൂപീകരിച്ച് പ്രതിഷേധസമരത്തിന് തയ്യാറെടുത്തിരിക്കുകയാണ്.

സമരത്തിന്റെ ഭാഗമായി, ജില്ലാ കളക്ടറേറ്റിന് മുന്നിൽ ധർണ നടത്തുവാൻ ആക്ഷൻ കമ്മിറ്റി തീരുമാനിച്ചിരിക്കുന്നു. കടുത്ത സാമ്പത്തിക പ്രതിസന്ധിയും ദുരിതവും നേരിടുന്നുണ്ടെന്നും ദിവസം 300 രൂപ വെച്ചുള്ള സംസ്ഥാന സർക്കാർ സഹായം പോലും ലഭിക്കുന്നില്ലെന്നും കമ്മിറ്റി ചൂണ്ടികാട്ടി.

പുനരധിവാസത്തിനായി എൽസ്റ്റൺ, നെടുമ്പാല എസ്റ്റേറ്റുകളിലെ ഭൂമി ഏറ്റെടുക്കാൻ സർക്കാർ നടപടി ആരംഭിച്ചുവെങ്കിലും, ഭൂമി ഏറ്റെടുക്കലിന് എസ്റ്റേറ്റ് ഉടമകൾ നിയമപരമായി എതിർപ്പ് പ്രകടിപ്പിക്കുകയും കേസ് കോടതിയുടെ പരിഗണനയിൽ വരികയും ചെയ്തിട്ടുണ്ട്. നവംബർ നാലിന് കേസ് പരിഗണിക്കുമെന്ന് കോടതി അറിയിച്ചു, അതുവരെ ഭൂമി ഏറ്റെടുക്കൽ തടഞ്ഞിരിക്കുകയാണ്. ഇതോടെയാണ് ദുരിതബാധിതർ ആക്ഷൻ കമ്മറ്റി രൂപീകരിച്ച് സമരത്തിന് ഒരുങ്ങുന്നത്.