ഭാര്യ തന്റെ മുഖത്തേക്ക് തിളച്ച ചായ ഒഴിച്ചു: ഭാര്യയെയും മകളെയും ഉപദ്രവിച്ചെന്ന പരാതി അടിസ്ഥാന രഹിതമെന്ന് ഭർത്താവ്; സത്യാവസ്ഥ പുറത്ത്

കോഴിക്കോട്: സ്ത്രിധത്തിന്റെ പേരിൽ യുവതിയേയും മകളെയും ക്രൂരമായി മർദ്ദിച്ചെന്ന പരാതി അടിസ്ഥാന രഹിതമാണെന്ന് ഭര്‍ത്താവ്. ഭാര്യ ഫിനിയ തന്റെ മുഖത്തേക്ക് തിളച്ച ചായ ഒഴിച്ചെന്നും, തനിക്കും മകള്‍ക്കും മാതാവിനും പൊള്ളലേറ്റെന്നും ഭർത്താവ് മൊഴി നൽകി.

താമരശ്ശേരി താഴേ പരപ്പന്‍പൊയില്‍ മോടോത്ത് ഷാജിയാണ് ഭാര്യ ഫിനിയയുടെ പരാതിക്കെതിരെ രംഗത്തെത്തിയത്. ഭാര്യ ഫിനിയയുടെ സഹോദരിക്ക് നൽകിയ പണം തിരിച്ച് ചോദിച്ചതിൻ്റെ പേരിലാണ് തൻ്റെ മുഖത്ത് ഭാര്യ തിളച്ച ചായ ഒഴിച്ചതെന്ന് അദ്ദേഹം പറഞ്ഞു. ഇതേതുടർന്ന് ഷാജിയുടെ മുഖത്തും, ശരീരമാസകലവും പൊള്ളലേറ്റിട്ടുണ്ട്. മാത്രമല്ല മകളുടെ കൈക്ക് പരിക്കേറ്റത് നേരത്തെ സൈക്കിളിൽ നിന്നും വീണപ്പോഴാണ്.

അതേസമയം ഭാര്യാ സഹോദരിക്ക് ബാങ്കിൽ നിന്നും കടമെടുത്ത് നൽകിയ പണം തിരിച്ചടക്കാത്തതിനാൽ ജപ്തി ഭീഷണി നേരിടുകയാണെന്നും ഷാജി പറഞ്ഞു. സംഭവത്തിൽ പോലീസ് നിഷ്പക്ഷമായി അന്വേഷണം നടത്തണമെന്നും ഷാജി ആവശ്യപ്പെട്ടു. കഴിഞ്ഞ വ്യാഴാഴ്ചയായിരുന്നു പരപ്പൻ പൊയിൽ വീട്ടിൽ വെച്ച് സംഭവം നടന്നത്. താൻ പറയുന്നത് കളവാണെങ്കിൽ നുണപരിശോധനക്ക് വിധേയനാക്കണമെന്നും ഷാജി പറഞ്ഞു. ഇരു വിഭാഗവും ആശുപത്രിയിൽ ചികിത്സ തേടുകയും, പോലീസിൽ പരാതി നൽകുകയും ചെയ്തിരുന്നു.