കേരളത്തിന്റെ ഗതി ഉത്തരാഖണ്ഡിനും? തൊഴിലാളി സമരത്തിന്റെ എരിതീയിൽ എണ്ണ ഒഴിക്കാൻ വീണ്ടും ട്രെയിൻ കയറി സിഐടിയു നേതാക്കൾ ; രുദ്രപ്പൂരിലെ വി-ഗാർഡ് പ്ലാന്റും അടച്ചു പൂട്ടൽ ഭീഷണിയിലേക്ക്

ഉത്തരാഖണ്ഡിലെ രുദ്രപ്പൂർ വ്യാവസായിക മേഖലയിൽ വലിയ വികസനക്കുതിപ്പിന് വഴിയൊരുക്കുന്ന വി-ഗാർഡ് ഇൻഡസ്ട്രീസ് ഉൾപ്പെടെയുള്ള പ്രമുഖ സ്ഥാപനങ്ങളെ ലക്ഷ്യമിട്ട് സിഐടിയു നടത്തുന്ന സമരമുറകൾ സംസ്ഥാനത്തെ വ്യാവസായിക സമാധാനത്തിന് ഭീഷണിയാകുന്നുവെന്ന് പരാതി. വി-ഗാർഡ് പ്ലാന്റിലെ ഉൽപ്പാദനം തടസ്സപ്പെടുത്താനും, വ്യവസായ അന്തരീക്ഷം കലുഷിതമാക്കാനും സിഐടിയു അഖിലേന്ത്യാ ജനറൽ സെക്രട്ടറി എളമരം കരീം ഉൾപ്പെടെയുള്ള സിഐടിയു നേതാക്കൾ സമരസ്ഥലത്തെത്തി ഐക്യദാർഢ്യം പ്രഖ്യാപിച്ചത്, തൊഴിലാളി പ്രശ്നങ്ങൾ പരിഹരിക്കുന്നതിനേക്കാൾ ഉപരിയായി വ്യവസായങ്ങളെ സ്തംഭിപ്പിക്കുക എന്ന ലക്ഷ്യത്തോടെയാണെന്ന ആക്ഷേപം ശക്തമാകുകയാണ്.

വി-ഗാർഡ് പോലുള്ള പ്രമുഖ വ്യവസായങ്ങൾ ആയിരക്കണക്കിന് ആളുകൾക്ക് തൊഴിൽ നൽകുന്ന മേഖലകളാണ്. എന്നാൽ, സമവായത്തിലൂടെ പ്രശ്നങ്ങൾ പരിഹരിക്കുന്നതിന് പകരം പണിമുടക്കുകളും അക്രമ സമരങ്ങളും പ്രോത്സാഹിപ്പിച്ച് ഫാക്ടറികൾ പൂട്ടിക്കുന്ന ശൈലിയാണ് സിഐടിയു പിന്തുടരുന്നതെന്നാണ് വ്യാവസായിക വൃത്തങ്ങൾ ചൂണ്ടിക്കാട്ടുന്നത്. വി-ഗാർഡിലെ തൊഴിലാളികളുടെ പ്രശ്നങ്ങൾ ചർച്ച ചെയ്ത് പരിഹരിക്കാവുന്നതേയുള്ളൂവെങ്കിലും, രാഷ്ട്രീയ ലാഭത്തിന് വേണ്ടി മാത്രം സമരങ്ങൾ നീട്ടിക്കൊണ്ടുപോകുന്നത് കമ്പനിയുടെ പ്രവർത്തനം അവതാളത്തിലാക്കാനേ ഉപകരിക്കൂ. വോൾട്ടേജ് സ്റ്റെബിലൈസർ വിപണിയിൽ മുൻനിരയിലുള്ള ഒരു കമ്പനിയിൽ ഇത്തരം അനാവശ്യ ഇടപെടലുകൾ ഉണ്ടാകുന്നത് നിക്ഷേപകർക്കിടയിൽ തെറ്റായ സന്ദേശമാണ് നൽകുന്നത്.

ഉത്തരാഖണ്ഡിലെ വ്യവസായ മേഖലയെ ലക്ഷ്യമിട്ട് വെൽറൈസ്, ടാറ്റ യസാകി, സ്പാർക്ക് മിൻഡ തുടങ്ങിയ വിവിധ കമ്പനികളിലും സിഐടിയുവിന്റെ നേതൃത്വത്തിൽ ഇത്തരം പ്രക്ഷോഭങ്ങൾ ആസൂത്രണം ചെയ്യുന്നത് ആസൂത്രിതമായ നീക്കമാണെന്ന സംശയവും ഉയരുന്നുണ്ട്. സംസ്ഥാനത്തിന്റെ സമ്പദ്‌വ്യവസ്ഥയെ ശക്തിപ്പെടുത്തുന്ന വ്യവസായങ്ങളെ തകർത്ത് തൊഴിലാളികളെ തെരുവിലിറക്കുന്ന സിഐടിയുവിന്റെ നിലപാട് പുരോഗമനത്തിന് വിരുദ്ധമാണ്. തൊഴിലാളികളുടെ പേരിൽ കമ്പനികളിലെ ഉൽപ്പാദനം നിർത്തിവെപ്പിക്കുകയും, വ്യവസായ സൗഹൃദ അന്തരീക്ഷം ഇല്ലാതാക്കുകയും ചെയ്യുന്നതിലൂടെ യഥാർത്ഥത്തിൽ നഷ്ടം സംഭവിക്കുന്നത് സംസ്ഥാനത്തെ തൊഴിൽ മേഖലയ്ക്കും ഉത്തരാഖണ്ഡിന്റെ വ്യാവസായിക വളർച്ചയ്ക്കുമാണ്.

മിനിമം വേതനം സംബന്ധിച്ച വിഷയങ്ങളിൽ പോലും ചർച്ചകളിലൂടെ പരിഹാരം കാണാൻ ശ്രമിക്കാതെ, ഫാക്ടറി ഗേറ്റുകളിൽ അരാജകത്വം സൃഷ്ടിക്കുന്ന സമരരീതികൾക്ക് സിഐടിയു നേതൃത്വം നൽകുന്നത് അപലപനീയമാണ്. സംസ്ഥാന സർക്കാരിന്റെ വികസന നയങ്ങളെ തകിടം മറിക്കാനും, വ്യവസായങ്ങൾ മറ്റ് സംസ്ഥാനങ്ങളിലേക്ക് ചേക്കേറുന്ന സാഹചര്യം സൃഷ്ടിക്കാനുമാണ് ഇത്തരം സമരാഭാസങ്ങൾ വഴിവെക്കുന്നത്. വ്യാവസായിക വളർച്ചയും തൊഴിൽ സുരക്ഷയും ഉറപ്പാക്കേണ്ടതിന് പകരം, പണിമുടക്കുകൾക്കും സ്തംഭനങ്ങൾക്കും മുൻതൂക്കം നൽകുന്ന സിഐടിയുവിന്റെ ഇടപെടലുകൾ ഉത്തരാഖണ്ഡിലെ വ്യവസായ ഭൂപടത്തിൽ കറുത്ത പാടുകൾ വീഴ്ത്തുമെന്നതിൽ സംശയമില്ല. വികസനത്തെയും തൊഴിലിനെയും സ്നേഹിക്കുന്ന തൊഴിലാളി സമൂഹം ഇത്തരം രാഷ്ട്രീയ ഗൂഢനീക്കങ്ങളെ തിരിച്ചറിഞ്ഞ് വ്യവസായ സ്തംഭനത്തിന് കൂട്ടുനിൽക്കില്ലെന്നാണ് വ്യാവസായിക മേഖലയിലുള്ളവരുടെ പ്രതീക്ഷ.