ജനങ്ങളോടുള്ള കർത്തവ്യം ഭയം കൊണ്ട് ഉപേക്ഷിക്കില്ല’ഡിസംബറിൽ ബംഗ്ലാദേശിലേക്ക് മടങ്ങിയെത്തുമെന്നാവർത്തിച്ച് ഷെയ്ഖ് ഹസീന

ദില്ലി : വരുന്ന ഡിസംബറിൽ താൻ ബംഗ്ലാദേശിലേക്ക് മടങ്ങിയെത്താൻ ആഗ്രഹിക്കുന്നുവെന്നാവർത്തിച്ച് മുൻ പ്രധാനമന്ത്രി ഷെയ്ഖ് ഹസീന. 2024-ൽ രാജ്യത്തുണ്ടായ വിദ്യാർത്ഥി പ്രക്ഷോഭത്തെ തുടർന്ന് അധികാരം നഷ്ടപ്പെട്ട് ഇന്ത്യയിൽ അഭയം തേടിയ ശേഷം ആദ്യമായി ദില്ലിയിൽ മാദ്ധ്യമങ്ങളോട് സംസാരിക്കുകയായിരുന്നു അവർ. തടവറയോ മരണമോ തനിക്ക് മുന്നിലുണ്ടാകാമെന്ന് അറിയാമെന്നും, എന്നാൽ ജനങ്ങളോടുള്ള ഉത്തരവാദിത്തം നിറവേറ്റുന്നതിൽ നിന്നും ഭയത്തിന് തന്നെ തടയാനാവില്ലെന്നും ഹസീന വ്യക്തമാക്കി. താൻ തിരികെ പോകുന്നത് അധികാര മോഹം കൊണ്ടല്ല, മറിച്ച് രാജ്യത്തെ വികസനത്തിന്റെയും മതേതരത്വത്തിന്റെയും പാതയിലേക്ക് തിരിച്ചുകൊണ്ടുവരാനാണെന്ന് അവർ കൂട്ടിച്ചേർത്തു.

വിദ്യാർത്ഥികളുടെ സംവരണ പ്രക്ഷോഭത്തെ തെറ്റായ പ്രചാരണങ്ങളിലൂടെ തനിക്കെതിരെയുള്ള പ്രക്ഷോഭമാക്കി ചില സംഘടിത ശക്തികൾ മാറ്റുകയായിരുന്നുവെന്ന് ഹസീന ആരോപിച്ചു. ജൂലൈ 15 മുതൽ പ്രക്ഷോഭത്തിന്റെ സ്വഭാവം മാറി അക്രമങ്ങൾ അഴിച്ചുവിടുകയും ബംഗ്ലാദേശ് ടെലിവിഷൻ അടക്കമുള്ള പൊതുസ്വത്തുക്കൾ തീയിടുകയും ചെയ്തു. പോലീസ് സ്റ്റേഷനുകൾ ആക്രമിക്കപ്പെടുകയും ഉദ്യോഗസ്ഥർ കൊല്ലപ്പെടുകയും ചെയ്ത ഘട്ടത്തിൽ രാജ്യത്തെ ജനങ്ങളുടെ ജീവനും സ്വത്തിനും സംരക്ഷണം നൽകുക മാത്രമാണ് സുരക്ഷാ സേന ചെയ്തതെന്നും അവർ വിശദീകരിച്ചു.

മുഹമ്മദ് യൂനുസിന്റെ നേതൃത്വത്തിൽ പിന്നീട് വന്ന ഇടക്കാല സർക്കാരിനെ അനധികൃത ഭരണകൂടം എന്ന് വിശേഷിപ്പിച്ച ഹസീന, അന്നത്തെ സംഭവവികാസങ്ങളെക്കുറിച്ചുള്ള അന്വേഷണം തടസ്സപ്പെടുത്തി സത്യം പുറത്തുവരുന്നത് യൂനുസ് സർക്കാർ ബോധപൂർവ്വം ഇല്ലാതാക്കുകയായിരുന്നുവെന്ന് ആരോപിച്ചു. ജനങ്ങളുടെ ജനാധിപത്യ പോരാട്ടത്തിന് ആഗോളസമൂഹം പിന്തുണ നൽകണമെന്ന് അഭ്യർത്ഥിച്ച അവർ, കടുത്ത പ്രതിസന്ധികൾക്കിടയിലും ബംഗ്ലാദേശിലെ സംഭവങ്ങൾ ധൈര്യപൂർവ്വം റിപ്പോർട്ട് ചെയ്യുന്ന മാദ്ധ്യമപ്രവർത്തകർക്ക് നന്ദി അറിയിക്കുകയും ചെയ്തു.