ആദ്യ ടെസ്റ്റിൽ ടോസ് നേടിയ വിൻഡീസ് ബാറ്റിങ് തിരഞ്ഞെടുത്തു; പേസ്‌നിരയുടെ പുതു തലമുറയെ പരീക്ഷിക്കാനൊരുങ്ങി ഇന്ത്യ

ഡൊമീനിക്ക : ഇന്ത്യയുടെ വിൻഡീസ് പരമ്പരയ്ക്ക് തുടക്കം കുറിച്ചുകൊണ്ടുള്ള ആദ്യ ടെസ്റ്റിൽ ടോസ് നേടിയ വിൻഡീസ് ബാറ്റിങ് തെരഞ്ഞെടുത്തു. മുൻനിര പേസർമാരില്ലാതെ ഇന്ത്യൻ പേസ്‌നിരയുടെ പുതു തലമുറയുമായാണ് ഇന്ത്യ വിൻഡീസിനെതിരെ പന്തെറിയാനൊരുങ്ങുന്നത് .

19 ടെസ്റ്റുകളുടെ മാത്രം മത്സരപരിചയമുള്ള മുഹമ്മദ് സിറാജാണ് ഇന്ത്യൻ പേസ് പടയെ നയിക്കുന്നത്. കൂട്ടിന് 9 ടെസ്റ്റുകൾ കളിച്ച ഷാർദൂൽ ഠാക്കൂർ, 2 മത്സരം വീതം കളിച്ച ജയ്ദേവ് ഉനദ്കട്ട്, നവ്ദീപ് സൈനി, അരങ്ങേറ്റ മത്സരത്തിനായി കാത്തിരിക്കുന്ന മുകേഷ് കുമാർ എന്നിവരാണ് പേസ് പടയിലെ മറ്റ് അംഗങ്ങൾ.

സീനിയർ താരങ്ങളായ ജസ്പ്രീത് ബുമ്രയും മുഹമ്മദ് ഷമിയും ടീമിലില്ലാത്തതിനാൽ യുവതാരങ്ങൾക്ക് തങ്ങളുടെ പ്രതിഭ തെളിയിക്കാൻ പറ്റിയ സാഹചര്യമാണ് വിൻഡീസ് മണ്ണിൽ ഒരുങ്ങിയിരിക്കുന്നത്. അതെ സമയം ബാറ്റിംഗ് നിരയിൽ സീനിയർ താരങ്ങളായ ക്യാപ്റ്റൻ രോഹിത് ശർമ, വൈസ് ക്യാപ്റ്റൻ അജിൻക്യ രഹാനെ, വിരാട് കോഹ്ലി എന്നിവർ ടീമിലുണ്ട്. ക്രെയ്ഗ് ബ്രാത്‌വെയ്റ്റ് നയിക്കുന്ന ടീമിന് ഇന്ത്യയെക്കാൾ പേസ് കരുത്തുണ്ട്. കെമർ റോച്ച്, ഷാനൺ ഗബ്രിയേൽ, അൽസാരി ജോസഫ്, ജയ്സൻ ഹോൾഡർ എന്നിവരാണ് വിൻഡീസ് ബൗളിംഗ് കൈകാര്യം ചെയ്യുന്നത്.