അടുത്ത വർഷം മുതൽ വനിതാ ഐപിഎൽ നടത്തും; പുത്തൻ പ്രഖ്യാപനവുമായി ബിസിസിഐ പ്രസിഡൻ്റ് സൗരവ് ഗാംഗുലി

ദില്ലി: രാജ്യത്ത് പൂർണ തോതിലുള്ള വനിതാ ഐപിഎൽ അടുത്ത വർഷം മുതൽ നടത്തുമെന്ന് ബിസിസിഐ പ്രസിഡൻ്റ് സൗരവ് ഗാംഗുലി. അതിനുള്ള നീക്കുപോക്കുകൾ നടക്കുകയാണ് എന്നും തീർച്ചയായും അത് സംഭവിക്കുമെന്നും പുരുഷ ഐപിഎൽ പോലെ വനിതാ ഐപിഎലും വൻ വിജയമായിരിക്കുമെന്നും ഗാംഗുലി പറഞ്ഞു.

“പൂർണ തോതിലുള്ള വനിതാ ഐപിഎലിനായുള്ള രൂപവത്കരണം നടക്കുകയാണ്. തീർച്ചയായും അത് സംഭവിക്കും. വനിതാ ഐപിഎ ആരംഭിക്കാനുള്ള ഏറ്റവും പറ്റിയ സമയം അടുത്ത വർഷം ആണെന്ന് ഞാൻ കരുതുന്നു. പുരുഷ ഐപിഎൽ പോലെ വനിതാ ഐപിഎലും വൻ വിജയമായിരിക്കും. ഒരുപാട് വനിതാ താരങ്ങൾ ഐപിഎലിനായി ആവശ്യമുണ്ട്. ഏകദേശം നാല് വർഷങ്ങൾക്കുള്ളിൽ മികച്ച താരങ്ങളെ ഉൾപ്പെടുത്തി ഏഴ് ടീമുകളുള്ള ഒരു വനിതാ ഐപിഎൽ നടത്താവുന്നതാണ്’- ഗാംഗുലി പറഞ്ഞു

അതേസമയം, ഇഎസ്പിഎൻ ക്രിക്ക് ഇൻഫോ ആണ് ഇക്കാര്യം റിപ്പോർട്ട് ചെയ്തത്. നേരത്തെ വനിതാ ടി-20 ചലഞ്ച് ഇക്കൊല്ലം നടക്കുമെന്ന് ഗാംഗുലി അറിയിച്ചിരുന്നു. എന്നാൽ കോവിഡ് ബാധയുടെ പശ്ചാത്തലത്തിൽ കഴിഞ്ഞ വർഷം ടി-20 ചലഞ്ച് ഒഴിവാക്കിയിരുന്നു.പക്ഷെ ഇക്കൊല്ലം പ്ലേ ഓഫുകളുടെ സമയത്ത് ടി-20 ചലഞ്ച് നടക്കും.