‘നിങ്ങള്‍ ഒന്ന് മിണ്ടാതിരുന്നാൽ മതി… കോഹ്‌ലി നല്ല മാനസികാവസ്ഥയിലാണ്; മാധ്യമങ്ങളോട് കയർത്ത് രോഹിത് ശര്‍മ

ദില്ലി: വിരാട് കോഹ്‌ലിയുടെ (virat kohli) ബാറ്റിങ് ഫോമിനെ ചൊല്ലി ഉയര്‍ന്ന ചോദ്യങ്ങളോട് രൂക്ഷമായി പ്രതികരിച്ച് രോഹിത് ശര്‍മ (Rohit sharma). വിന്‍ഡിസിന് എതിരായ മൂന്ന് ഏകദിനങ്ങളിലും കോഹ്ലി നിരാശപ്പെടുത്തിയതോടെയാണ് ഫോമിനെ ചൊല്ലിയുള്ള ചര്‍ച്ചകള്‍ സജീവമായത്. ഇതോടെ രോഹിത് ശര്‍മ പ്രതികരണവുമായി രംഗത്ത് എത്തുകയായിരുന്നു.

കോഹ് ലിയുടെ ഫോം ഇല്ലായ്മയെ എങ്ങനെയാണ് ക്യാപ്റ്റനും കോച്ചും നേരിടാന്‍ പോകുന്നത് എന്ന ചോദ്യത്തിനായിരുന്നു രോഹിത്തിന്റെ മറുപടി. ”നിങ്ങള്‍ കുറച്ച് സമയത്തേക്ക് മിണ്ടാതിരുന്നാല്‍ മതി, എനിക്ക് ഉറപ്പുണ്ട് എല്ലാം ശരിയാകും എന്ന്‌, രോഹിത് ശര്‍മ തുറന്നടിച്ചു. മാധ്യമങ്ങളാണ് ഇതിനെല്ലാം തുടക്കമിടുന്നത്. തനിക്ക് കാണാന്‍ കഴിയുന്നത്, കോഹ്ലി നല്ല മാനസിക നിലയിലാണ് എന്നാണ്. എങ്ങനെ സമ്മര്‍ദത്തെ കൈകാര്യം ചെയ്യണം എന്ന് കോഹ്ലിക്ക് അറിയാം-എന്നാണ് അദ്ദേഹം പറഞ്ഞത്.

അതേസമയം മൂന്ന് ഏകദിനങ്ങളില്‍ നിന്ന് കോഹ്‌ലിക്ക് നേടാനായത് 26 റണ്‍സ് മാത്രമായിരുന്നു. ഒരു ഏകദിന പരമ്പരയില്‍ 50ല്‍ താഴെ റണ്‍സ് കോഹ് ലി സ്‌കോര്‍ ചെയ്യുന്നത് 2015ന് ശേഷം ആദ്യമായിരുന്നു. സൗത്ത് ആഫ്രിക്കയ്ക്ക് എതിരായ രണ്ട് ടെസ്റ്റില്‍ നിന്ന് രണ്ട് അര്‍ധ ശതകമാണ് കോഹ് ലി കണ്ടെത്തിയത്.

മാത്രമല്ല നേരത്തെ ഏകദിന പരമ്പരയ്ക്കിടയില്‍ കോഹ്‌ലിയുടെ ഫോമിനെ ചൊല്ലി ഉയര്‍ന്ന ചോദ്യങ്ങളും രോഹിത് തള്ളിയിരുന്നു. ആത്മവിശ്വാസം നഷ്ടപ്പെട്ടതാണോ കോഹ് ലിയുടെ ഫോം ഇല്ലായ്മയ്ക്ക് കാരണം എന്നായിരുന്നു അന്ന് മാധ്യമ പ്രവര്‍ത്തകര്‍ ചോദിച്ചത്. ഇതോടെ നിങ്ങള്‍ ആരെക്കുറിച്ചാണ് ഈ പറയുന്നത് എന്ന് ചോദിച്ചായിരുന്നു അന്ന് ഈ ചോദ്യങ്ങളെ രോഹിത് ചിരിച്ചു തള്ളിയത്.