കോഴിക്കോട് റബർ തോട്ടത്തിൽ ദുരൂഹ സാഹചര്യത്തിൽ യുവതി പൊള്ളലേറ്റ് മരിച്ച നിലയിൽ; യുവതി വീട്ടിൽനിന്ന് ഇറങ്ങിയത് കഴിഞ്ഞ ദിവസം

കോഴിക്കോട് : ബാലുശ്ശേരി തലയാട് റബര്‍ തോട്ടത്തില്‍ ദുരൂഹ സാഹചര്യത്തിൽ യുവതി തീ പൊള്ളലേറ്റ് മരിച്ചു . നരിക്കുനി പുല്ലാളൂര്‍ അസീസിന്റെ ഭാര്യ സലീനയാണ് മരിച്ചത്. കഴിഞ്ഞ ദിവസം രാത്രി മൃതദേഹം കണ്ടെത്തിയിരുന്നെങ്കിലും ഇന്നാണ് തിരിച്ചറിഞ്ഞത്.

തലയാട് സെന്റ് ജോര്‍ജ് പള്ളിക്ക് സമീപമുള്ള റബര്‍ തോട്ടത്തിൽ പള്ളിപ്പെരുന്നാളിന് എത്തിയവരാണ് യുവതിയെ തീ പടരുന്ന നിലയില്‍ കണ്ടത്. ഓടിയെത്തുമ്പോഴേക്കും ശരീരം പൂര്‍ണമായും കത്തിക്കരിഞ്ഞിരുന്നു .

സലീന കഴിഞ്ഞ ദിവസം വീട്ടില്‍നിന്ന് ഇറങ്ങിയതാണെന്നാണ് പോലീസ് ഭാഷ്യം. വീട്ടില്‍നിന്നും 12 കിലോമീറ്ററോളം അകലെയുള്ള തലയാട്ടില്‍ സലീന എന്തിനെത്തി എന്നതിൽ ദുരൂഹത തുടരുകയാണ്. പോലീസ് സ്ഥലത്തെത്തി നടപടികള്‍ പൂര്‍ത്തിയാക്കി. അന്വേഷണം ആരംഭിച്ചു.