യൂട്യൂബര്‍ അബ്ദുല്‍ ഷുക്കൂറിന്റെ ആത്മഹത്യയ്ക്ക് കാരണം വട്ടിപ്പലിശക്കാരന്റെ ഭീഷണി;വീട്ടിലെത്തി വധഭീഷണി മുഴക്കിയെന്നും ഭാര്യയുടെ കയ്യില്‍ പിടിച്ച് വലിച്ചിറക്കിയെന്നും ആത്മഹത്യാകുറിപ്പില്‍

കൊച്ചി; ആലുവയില്‍ സ്വകാര്യ ലോഡ്ജില്‍ യൂട്യൂബര്‍ ആത്മഹത്യ ചെയ്ത സംഭവത്തില്‍ കൂടുതല്‍ വിവരങ്ങള്‍ പുറത്ത്. വട്ടിപ്പലിശക്കാരന്‍ വീട്ടിലെത്തി വധഭീഷണി മുഴക്കിയെന്നും ഭാര്യയുടെ കയ്യില്‍ പിടിച്ച് വലിച്ചിറക്കിയെന്നും മരിച്ച അബ്ദുല്‍ ഷുക്കൂര്‍ ആത്മഹത്യാകുറിപ്പില്‍ പറയുന്നു. രണ്ടാഴ്ച മുമ്പാണ് സംഭവം. ഭാര്യയ്‌ക്കൊപ്പമാണ് പലിശക്കാരന്‍ വീട്ടിലെത്തിയത്. 15 ദിവസത്തിനകം പണം തിരിച്ചു നല്‍കണമെന്ന് ആവശ്യപ്പെട്ടു. ഇല്ലെങ്കില്‍ കൊല്ലുമെന്നും വീട്ടില്‍ നിന്ന് ഇറക്കി വിടുമെന്നും ഭീഷണി മുഴക്കിയെന്നും ഷുക്കൂര്‍ ആരോപിക്കുന്നു. സംഭവത്തിന് പിന്നാലെ കടുത്ത മാനസിക സംഘര്‍ഷത്തിലായ ഇയാളെ ബുധനാഴ്ച രാത്രി 8 മണിക്കാണ് തൂങ്ങിമരിച്ച നിലയില്‍ കണ്ടെത്തിയത്.

കാക്കനാട് സ്വദേശിയായ അബ്ദുല്‍ ഷുക്കൂര്‍ മറ്റ് പലരില്‍ നിന്നും പണം കടം വാങ്ങിയിരുന്നു. റഹീം എന്നയാളില്‍ നിന്നു 2015ല്‍ അഞ്ചു ലക്ഷം രൂപ കടം വാങ്ങിയെന്നും 15 ലക്ഷത്തോളം തിരിച്ചടച്ചെന്നും ആത്മഹത്യാ കുറിപ്പില്‍ പറയുന്നു. എന്നിട്ടും ഇയാള്‍ നിരന്തരം ഫോണില്‍ വിളിച്ച് ഭീഷണിപ്പെടുത്തിയിരുന്നു. വീട് ഉള്‍പ്പടെ പണയപ്പെടുത്തി ഷുക്കൂര്‍ കടം എടുത്തിരുന്നതായാണ് വിവരം. താമസിച്ചിരുന്ന വീടിനു മുകളില്‍ ഒരു കട നടത്തുന്നുണ്ട്. ഇതും കടുത്ത പ്രതിസന്ധിയിലാണ്. നേരത്തെ മറ്റൊരു കട കൊവിഡ് പ്രതിസന്ധിക്കിടെ അടച്ചുപൂട്ടേണ്ടി വന്നു. ഇതിനിടെ വട്ടിപ്പലിശക്കാരന്‍ നേരിട്ട് വീട്ടില്‍ വന്ന് ഭീഷണി മുഴക്കിയതോടെ കൂടുതല്‍ സമ്മര്‍ദ്ദത്തിലാവുകയായിരുന്നു.

ഒരാഴ്ച മുമ്പാണ് ഷുക്കൂര്‍ ആലുവയിലെ സ്വകാര്യ ലോഡ്ജില്‍ മുറിയെടുക്കുന്നത്. ഒരാഴ്ചയായി വയനാട്ടിലും മറ്റും താമസിച്ച ശേഷമാണ് ഇവിടെയെത്തിയത്. ‘ഞാനൊരു കാക്കനാടന്‍’ എന്ന പേരിലായിരുന്നു യൂട്യൂബ് പേജ്. ജില്ലാ കലക്ടര്‍, ജില്ലാ പൊലീസ് കമ്മിഷണര്‍, സര്‍ക്കിള്‍ ഇന്‍സെപ്ക്ടര്‍, എസ്‌ഐ എന്നിവര്‍ക്കായി പ്രത്യേകം നാല് സെറ്റ് ആത്മഹത്യാ കുറിപ്പ് എഴുതി വച്ച ശേഷമാണ് ജീവനൊടുക്കിയത്.