ജനത കര്‍ഫ്യൂവും കൊവിഡ് നിയന്ത്രണങ്ങളും വകവച്ചില്ല, വിവാഹം നടത്തി.. വീട്ടുമുറ്റത്ത് പൊലീസ് എത്തി

തിരുവനന്തപുരം : ജനത കര്‍ഫ്യൂവും കൊവിഡ് നിയന്ത്രണങ്ങളും വകവയ്ക്കാതെ വിവാഹം നടത്തിയ വധുവിന്റെ പിതാവിനെ ഉള്‍പ്പെടെ നാലുപേരെ വട്ടിയൂര്‍ക്കാവ് പൊലീസ് അറസ്റ്റ് ചെയ്തു. വട്ടിയൂര്‍ക്കാവ് പാണങ്കര സ്വദേശി രാമകൃഷ്ണനേയും ഫോട്ടോഗ്രാഫറുള്‍പ്പെടെ നാലുപേരെയുമാണ് പോലീസ് അറസ്റ്റ് ചെയതത്.

കൂടാതെ,വിവാഹത്തില്‍ പങ്കെടുത്ത അറുപതോളം പേരെ വിവാഹ വീഡിയോകളില്‍ നിന്ന് തിരിച്ചറിഞ്ഞ പൊലീസ് അവരെയും പ്രതികളാക്കിയിട്ടുണ്ട്. വധുവിന്റെ വീട്ടില്‍ ഇന്നലെയായിരുന്നു വിവാഹ ചടങ്ങുകള്‍. ഇത് അവസാനിച്ച ഉടന്‍ പൊലീസെത്തി ഇവരെ അറസ്റ്റ് ചെയ്യുകയായിരുന്നു.

വിവരമറിഞ്ഞ് ആരോഗ്യവകുപ്പ്, നഗരസഭാ ജീവനക്കാര്‍ എന്നിവര്‍ സ്ഥലത്തെത്തി. ദുരന്ത നിവാരണചട്ടപ്രകാരവും നിയവവിരുദ്ധമായി സംഘം ചേര്‍ന്ന് പൊതുജന ആരോഗ്യത്തിന് ഭീഷണി സൃഷ്ടിച്ചതുള്‍പ്പെടെയുള്ള വകുപ്പുകളുമാണ് വിവാഹ ചടങ്ങ് സംഘടിപ്പിച്ചവര്‍ക്കും വീട്ടുകാര്‍ക്കുമെതിരെ ചുമത്തിയത്.
ഇവരെ പിന്നീട് സ്റ്റേഷന്‍ ജാമ്യത്തില്‍ വിട്ടയച്ചു.