ദില്ലി: സെപ്റ്റംബര് 13ന് നടക്കേണ്ട നീറ്റ് പരീക്ഷ നീട്ടിവയ്ക്കാന് കഴിയില്ലെന്ന് മെഡിക്കല് കൗണ്സില് ഓഫ് ഇന്ത്യ . ഇതുസംബന്ധിച്ച് മെഡിക്കല് കൗണ്സില് ഓഫ് ഇന്ത്യ സുപ്രീം കോടതിയില് സത്യവാങ് മൂലം നല്കി. നീറ്റ് പരീക്ഷ നീട്ടിവച്ചാല് അക്കാദമിക്ക് കലണ്ടര് തകിടം മറിയും. ഇനിയും പ്രവേശന നടപടികള് വൈകിയാല് ഈ വര്ഷം പ്രവേശനം നേടുന്ന വിദ്യാര്ത്ഥികള്ക്ക് ഗുണനിലവാരം ഉള്ള വിദ്യാഭ്യാസമോ, പരിശീലനമോ നല്കാന് കഴിയില്ലെന്നും മെഡിക്കല് കൗണ്സില് ഓഫ് ഇന്ത്യ സത്യവാങ്മൂലത്തില് വ്യക്തമാക്കി.
അതേസമയം ജെഇഇ പരീക്ഷ പോലെ വിദേശ രാജ്യങ്ങളില് നീറ്റ് പരീക്ഷ കേന്ദ്രങ്ങള് അനുവദിക്കാന് കഴിയില്ല. പരീക്ഷ കേന്ദ്രങ്ങള് അനുവദിക്കണമെങ്കില് സൂക്ഷമമായ ആസൂത്രണം ആവശ്യമാണ്. എന്നാല് അതിനി സാധ്യമല്ലെന്നും മെഡിക്കല് കൗണ്സില് ഓഫ് ഇന്ത്യ വ്യക്തമാക്കി. നീറ്റ് പരീക്ഷ ഓണ്ലൈനില് നടത്താന് കഴിയില്ലെന്നും സത്യവാങ്മൂലത്തില് വ്യക്തമാക്കിയിട്ടുണ്ട്.
എന്നാല് നീറ്റ് പരീക്ഷ സെപ്റ്റംബര് 13 ന് തന്നെ നടത്തും എന്ന് വ്യക്തമാക്കി ദേശിയ ടെസ്റ്റിംഗ് ഏജന്സി നേരത്തെ തന്നെ വാര്ത്ത കുറിപ്പ് ഇറക്കിയിരുന്നു. പരീക്ഷ നടത്തിപ്പിന് ഉള്ള സുരക്ഷാ പ്രോട്ടോകോള് അടുത്ത ആഴ്ച പുറത്തിറക്കുമെന്നും കേന്ദ്ര വിദ്യാഭ്യാസ മന്ത്രാലയത്തിലെ ഉന്നതോദ്യോഗസ്ഥര് അറിയിച്ചു.
