ഹിന്ദുവിൻ്റെ കടയിൽ കയറിയാൽ ആക്രമിക്കും; റംസാനിലും ഭീകരതയുമായി ചിലർ

ബംഗലൂരു: റംസാന്‍ പ്രമാണിച്ച് ഹിന്ദുവിന്റെ കടയില്‍ നിന്ന് വസ്ത്രങ്ങള്‍ വാങ്ങിയ യുവതികള്‍ക്ക് നേരെ മതമൗലികവാദികളുടെ കൈയ്യേറ്റ ശ്രമം. ദേവനഗരിയിലെ ഒരു കടയില്‍ നിന്നും വസ്ത്രങ്ങള്‍ വാങ്ങി പുറത്ത് വന്ന യുവതികളെ അക്രമികള്‍ തടഞ്ഞു നിര്‍ത്തുകയായിരുന്നു.

വസ്ത്രങ്ങള്‍ വാങ്ങിയ കടയില്‍ തന്നെ തിരിച്ചു കൊടുക്കാന്‍ ആക്രോശിക്കുന്ന രണ്ട് മുസ്ലീം യുവാക്കള്‍, യുവതികളുടെ കൈയ്യില്‍ നിന്നും വസ്ത്രങ്ങള്‍ കൈക്കലാക്കുകയും ഇവരെ നിര്‍ബന്ധിച്ച് ഓട്ടോയില്‍ കയറ്റി വിടുകയും ചെയ്യുന്ന ദൃശ്യങ്ങളാണ് സാമൂഹിക മാദ്ധ്യമങ്ങളില്‍ പ്രചരിക്കുന്നത്.

യുവതികള്‍ കടയില്‍ നിന്നും പുറത്തിറങ്ങിയ ഉടന്‍ ഒരു സംഘമാളുകള്‍ ഇവരെ വളയുകയും സദാചാര ഗുണ്ടായിസം നടത്തുകയും ചെയ്യുകയായിരുന്നു. ആ കടയില്‍ നിന്ന് തന്നെ സാധനം വങ്ങിയത് എന്തു കൊണ്ടാണെന്ന് ഇവര്‍ യുവതികളോട് ആവര്‍ത്തിച്ച് ചോദിച്ചു. തുടര്‍ന്നായിരുന്നു കൂട്ടത്തില്‍ നിന്ന് രണ്ട് യുവാക്കള്‍ വന്ന് യുവതികളെ ഭീഷണിപ്പെടുത്തി പറഞ്ഞയച്ചത്.

സംഭവത്തില്‍ ശക്തമായ പ്രതികരണവുമായി ബിജെപി രംഗത്തെത്തി. ഹിന്ദുവിന്റെ കടയില്‍ നിന്ന് റംസാന്‍ വസ്ത്രങ്ങള്‍ വാങ്ങിയ യുവതികള്‍ക്കെതിരായ മൗലികവാദികളുടെ ആക്രമണം അംഗീകരിക്കാനാവില്ലെന്ന് ബിജെപി എംപി ശോഭ കരന്തലജെ വ്യക്തമാക്കി.

ജനാധിപത്യ രാജ്യമായ ഇന്ത്യയില്‍ ശരീയത്ത് നിയമം നടപ്പിലാക്കാന്‍ ശ്രമിച്ച മതമൗലിക വാദികള്‍ക്ക് ഇന്ത്യന്‍ നിയമം എന്താണെന്ന് ഉടന്‍ മനസ്സിലാകുമെന്നും അവര്‍ ട്വിറ്ററില്‍ കുറിച്ചു.