ഹിമാലയം കാണണോ? നോക്കൂ…ഇതാ കൺമുന്നിൽ

പാറ്റ്ന : ദശാബ്ദങ്ങള്‍ക്ക് ശേഷം ബീഹാറിലെ ഗ്രാമങ്ങള്‍ക്ക് ഹിമാലയം ദൃശ്യമായി.ബീഹാറിലെ സിംഗ്വാഹിനിയെന്ന ഗ്രാമത്തില്‍ നിന്നെടുത്ത മഞ്ഞു മൂടിയ ഹിമാലയന്‍ മലനിരകളുടെ ചിത്രങ്ങള്‍ സമൂഹ മാധ്യമങ്ങളിലെല്ലാം ഇപ്പോള്‍ വൈറലായി.

സിംഗ്വാഹിനി ഗ്രാമത്തിലെ ഗ്രാമപഞ്ചായത്ത് മുഖ്യ റിതു ജയ്സ്വാലാണ് ട്വിറ്ററില്‍ ഈ ചിത്രം ആദ്യം പോസ്റ്റ് ചെയ്തത്.തന്റെ ഗ്രാമത്തില്‍ നിന്നും ആദ്യമായാണ് താന്‍ ഹിമാലയം കാണുന്നതെന്നും റിതു ട്വിറ്ററില്‍ കുറിച്ചിട്ടുണ്ട്.

ലോക്ക്ഡൗണ്‍ ജനങ്ങളെ ഒരുപാട് വലക്കുന്നുണ്ടെങ്കിലും പ്രകൃതി ശരിക്കും അതൊരു ആഘോഷമാക്കുന്നുണ്ടെന്നാണ് പുറത്ത് വരുന്ന റിപ്പോര്‍ട്ടുകള്‍ സൂചിപ്പിക്കുന്നത്.മലിനമായിരുന്ന നദികളില്‍ കുടിക്കാന്‍ യോഗ്യമായ ശുദ്ധജലം നിറയുന്നു,വിഷപ്പുകകള്‍ നിറഞ്ഞിരുന്ന അന്തരീക്ഷത്തിന്റെ ആധിപത്യം ശുദ്ധവായു ഏറ്റെടുക്കുന്നു.അങ്ങനെയങ്ങനെ ഒരുപാട് നല്ല മാറ്റങ്ങളാണ് ഈ ലോക്ക്ഡൗണ്‍ കാലം പ്രകൃതിക്ക് സമ്മാനിച്ചത്.ഗംഗാ നദിയില്‍ കുറച്ചു ദിവസം മുന്‍പ് ഡോള്‍ഫിനുകള്‍ തിരികെ വന്നതും വലിയ വാര്‍ത്തയായിരുന്നു.