സർവഐശ്യര്യത്തിനായി സഹപാഠിയെ നരബലി കൊടുത്ത് വിദ്യാർഥികൾ? സുഹൃത്തുക്കൾ ഉൾപ്പെടെ ഏഴു പേർക്കെതിരെ അന്വേഷണവുമായി പോലീസ്

മൈസൂരു: പത്താം ക്ലാസ് വിദ്യാർഥിയുടെ മൃതദേഹം തടാകത്തിൽ കണ്ടെത്തിയത് നരബലിയെ തുടർന്നാണെന്ന മാതാപിതാക്കളുടെ പരാതിയിൽ 2 സഹപാഠികൾ ഉൾപ്പെടെ 7 പേർക്കെതിരെ കേസ്. 16കാരനായ മഹേഷിന്റെ മൃതദേഹമാണ് ഹാലെപുര ​ഗ്രാമത്തിലെ നഞ്ചൻ​ഗുഡിൽ കണ്ടെത്തിയത്. കൂട്ടുകാർ വിളിച്ചുകൊണ്ടുപോയി നരബലി നടത്തുകയായിരുന്നു എന്നാണ് പരാതിയിൽ പറയുന്നത്.

ഒപ്പം പഠിക്കുന്ന 3 പേർ കാർ കഴുകാനെന്നു പറഞ്ഞു മകൻ മഹേഷിനെ വീട്ടിൽ നിന്നു തടാകക്കരയിലേക്കു കൂട്ടിക്കൊണ്ടു പോയതാണെന്നും അവിടെ നിന്നു ദുർമന്ത്രവാദത്തിനുപയോഗിക്കുന്ന ദ്രവ്യങ്ങൾ കണ്ടെത്തിയെന്നും പിതാവ് സിദ്ധരാജു പറയുന്നു. പൗർണ്ണമി ദിനത്തിൽ നരബലി നടത്തിയാൽ ഉയർച്ചയുണ്ടാകുമെന്നു വിശ്വസിക്കുന്ന ചില കുടുംബങ്ങളിൽപെട്ടവരാണിതു ചെയ്തതെന്നും പരാതിയിലുണ്ട്.

പ്രതികളിൽ ഏതാനും പേരെ ബുധനാഴ്ച പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. മഹേഷ് എന്ന യുവാവിന്റെ സംശയാസ്പദമായ മരണത്തിൽ സംശയിക്കുന്നവരെ ചോദ്യം ചെയ്തു വരികയാണെന്ന് മൈസൂരു പോലീസ് സൂപ്രണ്ട് ആർ.ചേതൻ പറഞ്ഞു.