ഒഡീഷനെത്തിയ 20 കുട്ടികളെ ബന്ദികളാക്കി ! പിന്നാലെ ഭീഷണി സന്ദേശം; പ്രതിയെ എൻകൗണ്ടറിൽ വകവരുത്തി മുംബൈ പോലീസ്

മുംബൈ : സിനിമ ഒഡീഷന് എത്തിയ കുട്ടികളെ ബന്ദികളാക്കിയാളെ എൻകൗണ്ടറിൽ വകവരുത്തി മുംബൈ പോലീസ്. മുംബൈയിലെ ആർ എ സ്റ്റുഡിയോയിലാണ് സംഭവം. ഈ സ്ഥാപനത്തിലെ ജീവനക്കാരനും യൂട്യൂബറുമായ രോഹിത് ആര്യ എന്നയാളാണ് കുട്ടികളെ തടവിലാക്കിയത്. കുട്ടികളെ മോചിപ്പിക്കാനെത്തിയ പോലീസിനെതിരെ ഇയാൾ എയർ ഗൺ വച്ച് വെടിയുതിർത്തതോടെ പോലീസും തിരിച്ചടിക്കുകയായിരുന്നു.

വീഡിയോ സന്ദേശത്തിലൂടെയാണ് ഇയാൾ കുട്ടികളെ ബന്ദികളാക്കിയ കാര്യം അറിയിച്ചത്. മണിക്കൂറുകൾ നീണ്ട കമാൻഡോ ഓപ്പറേഷനിൽ കൂടിയായിരുന്നു കുട്ടികളെ മോചിപ്പിച്ചത്. കമാൻഡോകളും ക്വിക് റെസ്പോൺസ് ടീമും വാതിൽ തകർത്ത് അകത്തുകയറുകയായിരുന്നു. തുടർന്ന് പ്രതിയുടെ കാലിൽ വെടിവെച്ചു. കുട്ടികളെ മോചിപ്പിച്ച ശേഷം പ്രതിയെ ആശുപത്രിയിൽ എത്തിച്ചു. ഇവിടെ വെച്ച് ഇയാൾ മരിച്ചതായാണ് റിപ്പോർട്ട്.

അതേസമയം ഇയാൾ വിദ്യാഭ്യാസ വകുപ്പിലെ കരാർ ജീവനക്കാരനായിരുന്നുവെന്നും കരാർ തുകയുടെ ബാക്കിയായി 80 ലക്ഷം രൂപയോളം കിട്ടാനുണ്ടെന്നും ഇതാണ് ഇയാളെ പ്രകോപിപ്പിച്ചതെന്നുമുള്ള വിവരങ്ങളും പുറത്തു വരുന്നുണ്ട്.