പി എം ശ്രീ പദ്ധതി; വിമർശനങ്ങൾ വേദനിപ്പിച്ചെന്ന് ശിവന്‍കുട്ടി; ഖേദമറിയിച്ച് എഐവൈഎഫ്

തിരുവനന്തപുരം: പിഎം ശ്രീ വിഷയത്തിലെ വിമര്‍ശങ്ങളില്‍ വിദ്യാഭ്യാസമന്ത്രിക്ക് വേദനിച്ചെങ്കില്‍ ഖേദം പ്രകടിപ്പിക്കുന്നുവെന്നും മന്ത്രിയുടെ ജാഗ്രതക്കുറവാണ് ചൂണ്ടിക്കാണിച്ചതെന്നും എഐവൈഎഫ്.
എഐവൈഎഫ് സംസ്ഥാന സെക്രട്ടറി ടിടി ജിസ്‌മോൻ പുറത്തിറക്കിയ വാർത്താകുറിപ്പിലാണ് വിശദീകരണം. സിപിഐ മന്ത്രിമാർക്കെതിരേയും എഐവൈഎഫ്, എഐഎസ്എഫ് എന്നീ സംഘടനകളുടെ സമരത്തിനുമെതിരെ മന്ത്രി ശിവൻ കുട്ടി രം​ഗത്തെത്തിയിരുന്നു.

പിഎം ശ്രീ വിഷയത്തിൽ എഐഎസ്എഫ് – എഐവൈഎഫ് പ്രതിഷേധം അതിരു കടന്നുവെന്നും വാക്കുകൾ സൂക്ഷിച്ച് ഉപയോഗിക്കണമെന്നുമുള്ള മന്ത്രി ശിവൻ കുട്ടിയുടെ പരാമർശം ശ്രദ്ധയിൽ പെട്ടുവെന്നും ജിസ്മോൻ പറഞ്ഞു.

വ്യക്തിപരമായ അധിക്ഷേപമോ മുദ്രാവക്യമോ ഉദ്യേശിച്ചില്ലെന്നാണാണ് എഐവൈഎഫ് പറയുന്നത്. ഇനി വിവാദങ്ങള്‍ വേണ്ടെന്ന സിപിഐ നേതൃത്വത്തിന്‍റെ തീരുമാന പ്രകാരമാണ് എഐവൈഎഫിന്‍റെ ഖേദ പ്രകടനം. ശിവന്‍കുട്ടിക്ക് വേദനയണ്ടായെങ്കില്‍ അത് അവസാനിപ്പിക്കാനുള്ള നടപടി സ്വീകരിക്കണം എന്നാണ് ബിനോയ് വിശ്വം നല്‍കിയ നിര്‍ദേശം.

എഐവൈഎഫ് സമരവുമായിബന്ധപ്പെട്ട് ബഹുമാനപ്പെട്ട് മന്ത്രിക്ക് എതെങ്കിലും തരത്തിൽ വേദന ഉണ്ടായിട്ടുണ്ടെങ്കിൽ ഖേദം പ്രകടിപ്പിക്കുന്നതായും സമരങ്ങളിൽ സംഘടനയുടെ പ്രഖ്യാപിത നിലപാടിന് വിരുദ്ധമായി എന്തെങ്കിലും പ്രവർത്തനങ്ങളുണ്ടായിട്ടുണ്ടെങ്കിൽ പരിശോധിച്ച് കർശന നടപടി സ്വീകരിക്കുമെന്നും ‌ടിടി ജിസ്‌മോൻ അറിയിച്ചു.