തിരുവനന്തപുരം: എസ്എസ്എല്സി പരീക്ഷ എഴുതിയവരില് മോഡറേഷന് ഇല്ലാതെ 98.11 ശതമാനം വിദ്യാര്ത്ഥികള് തുടര്പഠനത്തിന് യോഗ്യത നേടി. കഴിഞ്ഞ തവണത്തേക്കാള് 0.27 ശതമാനം വര്ദ്ധനവുണ്ടായി. പരീക്ഷ എഴുതിയ വിദ്യാര്ത്ഥികളില് 37,334 പേര് എല്ലാ വിഷയത്തിലും എ പ്ലസ് നേടി. കഴിഞ്ഞ തവണത്തേക്കാള് 3021 വിദ്യാര്ത്ഥികള്ക്ക് മുഴുവന് വിഷയങ്ങള്ക്കും എ പ്ലസ് ലഭിച്ചു. 599 സര്ക്കാര് സ്കൂളുകള് നൂറ് ശതമാനം വിജയം നേടി. തിരഞ്ഞെടുപ്പ് പെരുമാറ്റച്ചട്ടം നിലനില്ക്കുന്നതിനാല് വിദ്യാഭ്യാസ സെക്രട്ടറിയാണ് ഫലപ്രഖ്യാപനം നടത്തിയത്.
2,22,527 ആണ്കുട്ടികളും 2,12,615 പെണ്കുട്ടികളുമുള്പ്പെടെ 4,35,116 പേരാണ് എസ്എസ്എല്സി പരീക്ഷ എഴുതിയത്. ഇതില് പത്തനംതിട്ട റവന്യൂ ജില്ലയിലാണ് ഏറ്റവും കൂടുതല് വിജയശതമാനം രേഖപ്പെടുത്തിയത് (99.33%), കുറവ് വയനാട്ടില് (93.22%). 1631 സ്കൂളുകള് നൂറ് മേനി വിജയം നേടി. ഇതില് 599 സര്ക്കാര് സ്കൂളുകള്, 713 എയ്ഡഡ്, 390 അണ്എയ്ഡഡ് സ്കൂളുകളും നൂറ് മേനി നേടി.
കേരളത്തിലും ലക്ഷദ്വീപിലും ഗള്ഫിലും 2939 സെന്ററുകളിലായി 434729 വിദ്യാര്ഥികള് എസ്എസ്എല്സി പരീക്ഷ എഴുതി. മൂല്യനിര്ണയം 14 പ്രവൃത്തിദിവസം കൊണ്ട് പൂര്ത്തിയാക്കി. ഈ വര്ഷം ആര്ക്കും മോഡറേഷന് നല്കിയിട്ടില്ല. ആരുടെയും ഫലം തടഞ്ഞുവച്ചിട്ടില്ല.
