ലഖ്നൗ : ഉത്തര്പ്രദേശിലെ ഹത്റാസില് മതപരിപാടിക്കിടെ തിക്കിലും തിരക്കിലും പെട്ട് 90 പേര് മരിച്ചു. ഒരു ആത്മീയ നേതാവിൻ്റെ നേതൃത്വത്തിൽ നടന്ന സത്സംഗം പരിപാടിക്കിടെയാണ് അപകടം നടന്നത്. വലിയ പന്തലുകൾ കെട്ടിയായിരുന്നു പരിപാടി നടത്തിയിരുന്നത്. ഉത്തർപ്രദേശിൽ വലിയ ചൂടാണ് അനുഭവപ്പെടുന്നത്. ചൂട് സഹിക്കാനാവാതെ പന്തലിൽ നിന്ന് പുറത്തേക്ക് വരാൻ ആളുകൾ കൂട്ടത്തോടെ ശ്രമിച്ചതാണ് ദുരന്തത്തിനിടയാക്കിയത് . മരിച്ചവരിൽ 23 സ്ത്രീകളുമുണ്ട്. പരിക്കേറ്റവരെ ആശുപത്രികളിൽ പ്രവേശിപ്പിച്ചിരിക്കുകയാണ്.
സംഭവത്തിൽ പ്രധാനമന്ത്രി നരേന്ദ്ര മോദിയും പ്രതിപക്ഷ നേതാവ് രാഹുൽ ഗാന്ധിയും കോൺഗ്രസ് ദേശീയ അധ്യക്ഷൻ മല്ലികാര്ജ്ജുൻ ഖര്ഗെയും അനുശോചിച്ചു. ദുരന്ത വാര്ത്ത പ്രധാനമന്ത്രി നരേന്ദ്രമോദി പാര്ലമെൻ്റിൽ തന്റെ പ്രസംഗത്തിനിടെ സൂചിപ്പിച്ചു. കേന്ദ്രസർക്കാർ ഉത്തർപ്രദേശുമായി നിരന്തരം ബന്ധപ്പെടുന്നുണ്ടെന്ന് പ്രധാനമന്ത്രി പറഞ്ഞു.
