ദില്ലി : അജിത് ഡോവലിനെ ദേശീയ സുരക്ഷാ ഉപദേഷ്ടാവായി പുനഃനിയമിച്ച് കേന്ദ്രസർക്കാർ. പി.കെ മിശ്രയെ പ്രിൻസിപ്പൽ സെക്രട്ടറിയായും പുനഃനിയമിച്ചിട്ടുണ്ട്. ജൂൺ പത്ത് മുതലാണ് നിയമനം. ഈ മാസം അഞ്ചിനായിരുന്നു അജിത് ഡോവലിന്റെ കാലാവധി പൂർത്തിയാക്കിയത്. പ്രധാനമന്ത്രിയായി നരേന്ദ്രമോദി തുടരുന്നതുവരെയോ ഇനിയൊരു ഉത്തരവ് ഉണ്ടാകുന്നതുവരെയോ ഇരുവരും തല്സ്ഥാനത്ത് തുടരുമെന്നാണ് ഉത്തരവ്. ക്യാബിനറ്റ് റാങ്കോടെയാണ് ഇരുവരുടേയും നിയമനം.
പത്തുവർഷമായി രാജ്യത്തിന്റെ സുരക്ഷാ ഉപദേഷ്ടാവായ അജിത് ഡോവൽ, 1968 ബാച്ച് കേരള കേഡർ ഐപിഎസ് ഉദ്യോഗസ്ഥനാണ്. 20 വർഷമായി ചൈനയുമായുള്ള അതിർത്തി ചർച്ചകൾക്കുള്ള ഇന്ത്യയുടെ പ്രത്യേക പ്രതിനിധികൂടിയാണ്. മോദി ആദ്യം പ്രധാനമന്ത്രിയായി ചുമതലയേറ്റ 2014 മേയ് 30-നാണ് ഡോവലിനെ നിയമിച്ചത്. അതിനുമുമ്പ് ഇന്റലിജൻസ് ബ്യൂറോ മേധാവിയായും അദ്ദേഹം സേവനം അനുഷ്ഠിച്ചിട്ടുണ്ട് .
1988-ലെ ‘ഓപ്പറേഷൻ ബ്ലാക്ക് തണ്ടർ, 1999-ലെ കാണ്ഡഹാർ രക്ഷാദൗത്യം, 2016-ൽ പാകിസ്ഥാനെതിരെ നടത്തിയ സർജിക്കൽ സ്ട്രൈക്ക്, 2019-ലെ ബാലാകോട്ട് ആക്രമണം എന്നീ ദൗത്യങ്ങളിലും ഡോവൽ നിർണായക പങ്കുവഹിച്ചു.
