ദില്ലി : ഭാരതത്തിന്റെ ഇന്ത്യയുടെ അഭിമാനകരമായ അഞ്ചാം തലമുറ സ്റ്റെൽത്ത് പോർവിമാനം അഡ്വാൻസ്ഡ് മീഡിയം കോംബാറ്റ് എയർക്രാഫ്റ്റ് (AMCA) നിർമ്മിക്കുന്നതിനായുള്ള പങ്കാളിത്തത്തിന് ഏഴ് മുൻനിര കമ്പനികൾ പ്രതിരോധ ഗവേഷണ വികസന സ്ഥാപനമായ ഡിആർഡിഒയുമായി (DRDO) സഹകരിക്കാൻ ബിഡ് സമർപ്പിച്ചു. ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL), ലാർസൻ ആൻഡ് ടൂബ്രോ (L&T), ടാറ്റ അഡ്വാൻസ്ഡ് സിസ്റ്റംസ് ലിമിറ്റഡ് (TASL), അദാനി ഡിഫൻസ് എന്നിവയുൾപ്പെടെയുള്ള പ്രമുഖ കമ്പനികളാണ് മത്സരരംഗത്തുള്ളത്.
ഈ ഏഴ് കമ്പനികളിൽ നിന്ന് രണ്ട് കമ്പനികളെ തിരഞ്ഞെടുത്ത്, 15,000 കോടി രൂപയുടെ ഫണ്ട് നൽകും. ഉയർന്ന നിലവാരത്തിലുള്ള അഞ്ച് AMCA മോഡലുകൾ നിർമ്മിക്കുന്നതിനാണ് ഈ തുക ഉപയോഗിക്കുക. മോഡലുകൾ വിജയകരമായി നിർമ്മിച്ച ശേഷം അന്തിമ ഉൽപാദന അവകാശങ്ങൾ നൽകും.
മുൻ ബ്രഹ്മോസ് എയ്റോസ്പേസ് മേധാവി എ. ശിവതാണു പിള്ള അദ്ധ്യക്ഷനായ സമിതിയാണ് നിലവിൽ സമർപ്പിച്ച ബിഡ്ഡുകൾ വിലയിരുത്തുന്നത്. ഈ സമിതിയുടെ റിപ്പോർട്ട് പ്രതിരോധ മന്ത്രാലയത്തിന് സമർപ്പിച്ച ശേഷമായിരിക്കും അന്തിമ തീരുമാനം എടുക്കുക.
2 ലക്ഷം കോടിയിലധികം രൂപയുടെ* നിർമ്മാണ പദ്ധതിയാണ് AMCA. ഈ പദ്ധതി വഴി 125-ൽ അധികം പോർവിമാനങ്ങൾ നിർമ്മിക്കാൻ ലക്ഷ്യമിടുന്നു. എങ്കിലും, 2035-ന് മുൻപ് AMCA ഇന്ത്യൻ വ്യോമസേനയുടെ ഭാഗമാകാൻ സാധ്യതയില്ലെന്നാണ് റിപ്പോർട്ടുകൾ. അഞ്ചാം തലമുറ സ്റ്റെൽത്ത് പോർവിമാനങ്ങൾ നിർമ്മിക്കുന്നതോടെ അമേരിക്ക (F-22, F-35), ചൈന (J-20), റഷ്യ (Su-57) തുടങ്ങിയ വൻശക്തി രാഷ്ട്രങ്ങളുടെ പട്ടികയിൽ ഇന്ത്യയും ഇടംനേടും.
ഭാരതത്തിന്റെ ആദ്യത്തെ അഞ്ചാം തലമുറ പോർവിമാനം ഒറ്റ സീറ്റുള്ളതും ഇരട്ട എഞ്ചിൻ കരുത്തുള്ളതുമായിരിക്കും. അമേരിക്കൻ, റഷ്യൻ വിമാനങ്ങളിലേതുപോലെ വിപുലമായ സ്റ്റെൽത്ത് കോട്ടിംഗുകളും ആന്തരിക ആയുധ അറകളും ഉണ്ടാകും.55,000 അടി വരെയാണ് ഇതിന്റെ ഓപ്പറേഷണൽ സീലിംഗ്. ആന്തരിക അറകളിൽ 1,500 കിലോഗ്രാം ആയുധങ്ങളും പുറമെ 5,500 കിലോഗ്രാം ആയുധങ്ങളും വഹിക്കാൻ കഴിയും. കൂടാതെ, 6,500 കിലോഗ്രാം ഇന്ധനവും ഇതിൽ ഉൾക്കൊള്ളാൻ സാധിക്കും.
പോർവിമാനത്തിലെ ഏറ്റവും പ്രധാന ഘടകം, പൈലറ്റിന് യുദ്ധരംഗത്തെക്കുറിച്ചും ശത്രുക്കളെക്കുറിച്ചുമുള്ള വിവരങ്ങൾ വിശദമായി നൽകുന്ന അത്യാധുനിക യുദ്ധക്കള സോഫ്റ്റ്വെയർ ആണ്. മെച്ചപ്പെട്ട സാഹചര്യപരമായ അവബോധത്തിനായി സൗഹൃദ സേനകളുമായി ശൃംഖലയിൽ ബന്ധിപ്പിക്കാൻ കഴിയുന്ന നൂതന ഏവിയോണിക്സ് സംവിധാനങ്ങളും ഇതിനുണ്ടാകും.
ആണവായുധ ശേഷിയുള്ള പാകിസ്ഥാനുമായും ചൈനയുമായുമുണ്ടായ സമീപകാല സംഘർഷങ്ങളുടെ പശ്ചാത്തലത്തിൽ ആയുധങ്ങളും ഉപകരണങ്ങളും നവീകരിച്ച് സൈന്യത്തെ ആധുനികവത്കരിക്കാനുള്ള ഇന്ത്യയുടെ ശ്രമങ്ങൾക്ക് AMCA പദ്ധതി ഊന്നൽ നൽകുന്നു. ഈ നവീകരണത്തിന്റെ ഭാഗമായി, അടുത്തിടെ ഫ്രാൻസിലെ ദസ്സോ ഏവിയേഷനിൽ നിന്ന് 26 റാഫേൽ-എം (മറൈൻ പതിപ്പുകൾ) ഫൈറ്റർ ജെറ്റുകൾ വാങ്ങുന്നതിനായി 63,000 കോടി രൂപയുടെ കരാറിൽ ഇന്ത്യ ഒപ്പുവെച്ചിരുന്നു. 2031-ൽ വിതരണം ചെയ്യാനിരിക്കുന്ന ഈ വിമാനങ്ങൾ പഴയ റഷ്യൻ MiG29K-കൾക്ക് പകരമാകും. വ്യോമസേന നിലവിൽ 36 റാഫേൽ-സി ഫൈറ്ററുകൾ ഉപയോഗിക്കുന്നുണ്ട്.
