തിരുവനന്തപുരം: മുഖ്യമന്ത്രി പിണറായി വിജയനെതിരെ ആഞ്ഞടിച്ച് സിപിഐ മുഖപത്രം ജനയുഗത്തിന്റെ എഡിറ്റോറിയല്. സിപിഐ നേതാവും മുന് മുഖ്യമന്ത്രിയുമായിരുന്ന എ.അച്യുതമേനോനെ പരാമര്ശിക്കാതെയുള്ള പ്രസംഗത്തിനെതിരെയാണ് വിമര്ശനം.
ഇടതുപക്ഷ രാഷ്ട്രീയത്തിന് ഭൂഷണമല്ലെന്ന് മുഖപ്രസംഗം വിമര്ശിക്കുന്നു. ചരിത്ര വസ്തുതകളെ മുഖ്യമന്ത്രി മനഃപൂര്വ്വം തമസ്കരിച്ചുവെന്നാണ് കുറ്റപ്പെടുത്തല്. മുഖ്യമന്ത്രി യാഥാര്ത്ഥ്യങ്ങള് അംഗീകരിക്കാന് വിസമ്മതിക്കുന്നുവെന്നും മുഖപ്രസംഗത്തിലുണ്ട്. ചരിത്രം ഐതിഹ്യങ്ങളോ കെട്ടുകഥകളോ അല്ലെന്നും മുഖപ്രസംഗത്തില് പറയുന്നു.
ഭൂപരിഷ്കരണ നിയമത്തിന്റെ സുവര്ണ ജൂബിലി ആഘോഷങ്ങള് തിരുവനന്തപുരത്ത് നടന്നപ്പോള് നടത്തിയ പ്രസംഗമാണ് വിമര്ശനത്തിന് കാരണം.
ഭൂപരിഷ്കരണ നിയമം നടപ്പിലാക്കുന്നതില് ഇഎംഎസ്, ഇകെ നായനാര് സര്ക്കാരുകള് നടത്തിയ ഇടപെടലുകളെ അഭിനന്ദിച്ചുകൊണ്ടായിരുന്നു മുഖ്യമന്ത്രി സംസാരിച്ചത്. എന്നാല് അച്യുതമേനോനെ കുറിച്ച് ഒരു വാക്ക് പോലും പറയാന് തയ്യാറാകാതിരുന്നത് അന്ന് തന്നെ വലിയ വിവാദങ്ങള്ക്ക് വഴിവച്ചിരുന്നു.
