പെല്ലറ്റ് പ്രയോഗം നടന്നിട്ടുണ്ടോ ഇല്ലയോ എന്നത് ഉന്നതതല സമിതി അന്വേഷിച്ച് വരുന്ന കാര്യം !ഇതിനിടയിൽ ഇത്തരം സമരങ്ങൾ സംഘടിപ്പിക്കുന്നത് എന്തിന് ? അരാജകത്വ രാഷ്ട്രീയത്തിന്റെ ഭാഗം മാത്രം! പാർലമെന്റ് സ്ട്രീറ്റ് സ്റ്റേഷനിലെ രാഹുൽ ഗാന്ധിയുടെ സമരത്തിനെതിരെ രൂക്ഷ വിമർശനവുമായി ബിജെപി

ദില്ലി : അനുമതിയില്ലാതെ പോലീസ് സ്റ്റേഷന് മുന്നിൽ ധർണ്ണ സമരം നടത്തിയ ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ കടുത്ത വിമർശനവുമായി ബിജെപി. നിയമവ്യവസ്ഥയോട് അനാദരവ് കാട്ടുന്നതാണ് രാഹുലിന്റെ നടപടിയെന്നും ഇത് രാജ്യത്ത് അരാജകത്വം സൃഷ്ടിക്കാനേ ഉപകരിക്കൂ എന്നും ബിജെപി കുറ്റപ്പെടുത്തി.

സംഭവവുമായി ബന്ധപ്പെട്ട് ഇതിനോടകം തന്നെ എഫ്.ഐ.ആർ രജിസ്റ്റർ ചെയ്ത് പൊലീസ് അന്വേഷണം നടത്തിവരികയാണെന്ന് വാർത്താസമ്മേളനത്തിൽ സംസാരിച്ച ബിജെപി എംപി രവിശങ്കർ പ്രസാദ് വ്യക്തമാക്കി. കൂടാതെ, വിഷയം സുപ്രീംകോടതിയുടെ ശക്തമായ നിരീക്ഷണത്തിലാണെന്നും സുപ്രീം കോടതി മുൻ ജഡ്ജിയുടെ നേതൃത്വത്തിൽ ഉന്നതതല സമിതി ഈ വിഷയം അന്വേഷിക്കുന്നുണ്ടെന്നും അദ്ദേഹം ചൂണ്ടിക്കാണിച്ചു. കോടതിയുടെ പരിഗണനയിലുള്ള ഒരു വിഷയത്തിൽ യാതൊരു മുൻകൂട്ടി അനുമതിയും വാങ്ങാതെ രാഹുൽ ഗാന്ധി നടത്തിയ സമരം നിയമവ്യവസ്ഥയോടുള്ള വെല്ലുവിളിയാണെന്ന് ബിജെപി ആരോപിച്ചു.

തോക്ക് പ്രയോഗം നടന്നിട്ടുണ്ടോ ഇല്ലയോ എന്നത് ഉന്നതതല സമിതി അന്വേഷിച്ച് വരുന്നതേയുള്ളൂവെന്നും, ഇതിനിടയിൽ ഇത്തരം സമരങ്ങൾ സംഘടിപ്പിക്കുന്നത് എന്തിനാണെന്നും രവിശങ്കർ പ്രസാദ് ചോദിച്ചു. മുന്നറിയിപ്പുകളോ അനുമതികളോ ഇല്ലാതെ എവിടെയും ചെന്നിരുന്ന് പ്രതിഷേധിക്കുന്നത് അരാജകത്വ രാഷ്ട്രീയത്തിന്റെ ഭാഗമാണെന്നും അദ്ദേഹം കൂട്ടിച്ചേർത്തു. ദേശീയഗീതമായ വന്ദേമാതരത്തോടുള്ള കോൺഗ്രസിന്റെ നിലപാടുകളെയും വിമർശിച്ച ബിജെപി നേതാക്കൾ, രാഹുൽ ഗാന്ധിയുടെ നേതൃത്വത്തിലുള്ള ഇത്തരം സമരങ്ങൾക്കെതിരെ ശക്തമായ ജനവികാരം ഉയരുമെന്നും വ്യക്തമാക്കി.