സംസാര ശേഷി നഷ്ടപ്പെട്ടയാള്‍ നാല്‍പ്പതാണ്ടിന് ശേഷം സംസാരിച്ചു

കോഴിക്കോട്: ചെറുപ്പത്തിലേ സംസാര ശേഷി നഷ്ടപ്പെട്ടയാള്‍ നാല് പതിറ്റാണ്ടിന് ശേഷം സംസാരിച്ചു തുടങ്ങി. കോഴിക്കോട് കുറ്റ്യാടി തേലേരി ബാബുവാണ് നാട്ടുകാരെയും ബന്ധുക്കളെയും ഞെട്ടിച്ച് കൊണ്ട് സംസാരിച്ചു തുടങ്ങിയത്.

എല്ലാ ചോദ്യത്തിനും ബാബുവിനിപ്പോള്‍ മറുപടി പറയായാകുന്നു. കഴിഞ്ഞ ദിവസം പെട്ടെന്ന് വീട്ടില്‍ നിന്നിറങ്ങിപ്പോയപ്പോള്‍ തടഞ്ഞ സഹോദരനോടാണ് ബാബു ആദ്യമായി സംസാരിച്ചത്. നാല് പതിറ്റാണ്ടോളം തുടര്‍ന്ന ബാബുവിന്റെ മൗനം അവസാനിച്ചതിന്റെ അമ്പരപ്പിലും സന്തോഷത്തിലുമാണ് വീട്ടുകാര്‍.

കുറ്റ്യാടി നാദാപുരം കണ്ണംകുളം എല്‍പി സ്‌കൂളില്‍ നാലാം തരത്തില്‍ പഠിക്കുമ്പോഴാണ് ബാബുവിന് പെട്ടെന്ന് സംസാരി ശേഷി നഷ്ടമായത്. അതോടെ ചുറുചുറുക്കും ആരോഗ്യവും നഷ്ടമായ ബാബു കഴിഞ്ഞ നാല്‍പത് കൊല്ലവും വീട്ടില്‍ തന്നെ കഴിയുകയായിരുന്നു.

സംസാര ശേഷി വീണ്ടുകിട്ടിയതോടെ ബാബു പുറത്തിറങ്ങി അയല്‍ വീടുകളില്‍ പോകാനും തുടങ്ങി. ബാബുവിനെ കാണാന്‍ നിരവധി പേരാണ് ഇപ്പോള്‍ വീട്ടിലെത്തുന്നത്. മറ്റ് ബുദ്ധിമുട്ടുകളൊന്നുമില്ലാത്തതിനാല്‍ ബാബുവിനെ ആശുപത്രിയില്‍ കൊണ്ട് പോകേണ്ടതില്ലെന്ന തീരുമാനത്തിലാണ് വീട്ടുകാരിപ്പോള്‍.