പത്തനംതിട്ടയിൽ കാപ്പ കേസ് പ്രതി ശരൺ ചന്ദ്രനൊപ്പം അടുത്തിടെ സിപിഎമ്മിൽ ചേർന്നയാൾ കഞ്ചാവുമായി എക്സൈസ് പിടിയിൽ. പത്തനംതിട്ട മൈലാടുംപാറ സ്വദേശി യദു കൃഷ്ണനെയാണ് രണ്ട് ഗ്രാം കഞ്ചാവുമായി പിടികൂടിയത്. ഇയാൾക്കെതിരെ കേസെടുത്ത എക്സൈസ് സംഘം പ്രതിയെ ജാമ്യത്തിൽ വിട്ടു.
ഇക്കഴിഞ്ഞ വെള്ളിയാഴ്ചയാണ് കാപ്പാ കേസ് പ്രതിയായ ശരൺ ചന്ദ്രനൊപ്പം യദു കൃഷ്ണനടക്കം 62 പേര് സിപിഎമ്മിൽ ചേര്ന്നത്. പത്തനംതിട്ട സിപിഎം ജില്ലാ സെക്രട്ടറി കെപി ഉദയഭാനുവാണ് ഇവരെ മലയണിയിച്ച് പാര്ട്ടിയിലേക്ക് സ്വീകരിച്ചത്. സ്ഥലം എംഎൽഎയും മന്ത്രിയുമായ വീണ ജോര്ജായിരുന്നു ചടങ്ങ് ഉദ്ഘാടനം ചെയ്തത്. നിരന്തരം ക്രിമിനൽ കേസ് രജിസ്റ്റര് ചെയ്യപ്പെട്ട പ്രതിക്കെതിരെ കാപ്പാ കേസ് ചുമത്തിയിരുന്നെങ്കിലും പിന്നീട് ഇയാൾ വീണ്ടും കുറ്റകൃത്യങ്ങളിൽ ഏര്പ്പെട്ടതോടെയാണ് അറസ്റ്റ് ചെയ്ത് റിമാന്റിലാക്കിയത്. ഹൈക്കോടതിയിൽ നിന്ന് ജാമ്യം നേടി പുറത്തിറങ്ങിയ ശേഷമാണ് ശരൺ ചന്ദ്രനടക്കമുള്ളവര് സിപിഎമ്മിൽ ചേര്ന്നത്.
