ഓടിക്കൊണ്ടിരുന്ന സ്ലീപ്പർ ബസിന് തീപിടിച്ചു; 36 യാത്രക്കാർ രക്ഷപ്പെട്ടത് അത്ഭുതകരമായി; ഡ്രൈവറുടെ ജാഗ്രത ഒഴിവാക്കിയത് വൻ ദുരന്തം

ഹാസൻ: കർണാടകയിലെ ഹാസനിൽ ദേശീയപാതയിൽ ഓടിക്കൊണ്ടിരുന്ന സ്വകാര്യ സ്ലീപ്പർ ബസിന് തീപിടിച്ചു. മംഗളൂരുവിൽ നിന്നും ബെംഗളൂരുവിലേക്ക് വരികയായിരുന്ന ‘ഭാരത്’ എന്ന ബസാണ് അപകടത്തിൽപ്പെട്ടത്. ബസ് പൂർണ്ണമായും കത്തിനശിച്ചെങ്കിലും ഡ്രൈവറുടെ സമയോചിതമായ ഇടപെടൽ മൂലം 36 യാത്രക്കാരും പരിക്കേൽക്കാതെ അത്ഭുതകരമായി രക്ഷപ്പെട്ടു.

ദേശീയപാതയിൽ ശാന്തിഗ്രാം എന്ന സ്ഥലത്ത് ബസ് എത്തിയപ്പോഴാണ് ടയറിന് തീപിടിച്ചത് ഡ്രൈവറുടെ ശ്രദ്ധയിൽപ്പെട്ടത്. അപകടം മണത്ത ഡ്രൈവർ ഉടൻ തന്നെ ബസ് റോഡ് സൈഡിലേക്ക് ഒതുക്കി നിർത്തുകയും, ഉറങ്ങിക്കിടക്കുകയായിരുന്ന യാത്രക്കാരെ വിളിച്ചുണർത്തി വേഗത്തിൽ പുറത്തിറക്കുകയും ചെയ്തു. യാത്രക്കാർ എല്ലാവരും സുരക്ഷിതമായി പുറത്തിറങ്ങി നിമിഷങ്ങൾക്കകം തന്നെ തീ ബസിലാകെ പടരുകയായിരുന്നു.

തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. വിവരമറിഞ്ഞ് സ്ഥലത്തെത്തിയ അഗ്നിശമനസേന യൂണിറ്റുകൾ ചേർന്നാണ് തീ നിയന്ത്രണവിധേയമാക്കിയത്. സംഭവത്തിൽ പൊലീസും മോട്ടോർ വാഹന വകുപ്പ് ഉദ്യോഗസ്ഥരും അന്വേഷണം ആരംഭിച്ചിട്ടുണ്ട്.