തൃശൂരിൽ അമിതവേഗതയിലെത്തിയ കാർ ബസിലേക്ക് ഇടിച്ചുകയറി; ഒരു കുടുംബത്തിലെ 4 പേർ മരിച്ചു

തൃശൂർ : അമിതവേഗതയിലെത്തിയ കാർ ബസിലേക്ക് ഇടിച്ചുകയറി ഒരു കുടുംബത്തിലെ 4 പേർ മരിച്ചു. കാറിലെ യാത്രക്കാരായ നാലു പേരാണ് മരിച്ചത്. തൃശൂർ സെന്റ് തോമസ് കോളജിലെ റിട്ട. അധ്യാപകൻ വിന്‍സന്റ്, ഭാര്യ മേരി, വിൻസന്റിന്റെ സഹോദരൻ തോമസ്, സഹോദരീ ഭർത്താവ് ജോസഫ് എന്നിവരാണു അപടത്തിൽ മരിച്ചത്.

കാഞ്ഞാണിയിൽനിന്ന് തൃശൂരിലേക്ക് വരികയായിരുന്ന കാറും വാടാനപ്പള്ളി ഭാഗത്തേക്കു പോകുകയായിരുന്ന ബസുമാണ് അപകടത്തിൽപെട്ടത് . മറ്റൊരു കാറിനെ മറികടക്കാൻ ശ്രമിക്കുന്നതിനിടെ കാർ ബസിലേക്ക് ഇടിച്ചു കയറുകയായിരുന്നു. കാറിന്റെ മുൻവശം പൂർണമായും തകർന്നു. ഉടനെ നാട്ടുകാർ രക്ഷാപ്രവർത്തനം നടത്തിയെങ്കിലും കാറിലുണ്ടായിരുന്നവരെ രക്ഷിക്കാനായില്ല.