നാട്ടിലിറങ്ങിയ പുള്ളിപ്പുലിയെ കടിച്ചു പറിച്ച് തെരുവുനായ. മഹാരാഷ്ട്രയിലെ നാസിക്കിലാണ് അത്യപൂർവ്വമായ സംഭവം നടന്നത്. നാതിർത്തിയിൽ നിന്ന് ജനവാസ മേഖലയിലേക്ക് കടന്നുവന്ന പുള്ളിപ്പുലിയെ ധീരമായി ചെറുത്ത് തോൽപ്പിച്ച് തുരത്തിയോടിക്കുന്ന തെരുവുനായയുടെ ദൃശ്യങ്ങൾ സമൂഹ മാദ്ധ്യമങ്ങളിൽ ഇതിനോടകം വൈറലായിട്ടുണ്ട്.
നാസിക്കിലെ നിപാദിലാണ് കൗതുകകരമായ ഈ സംഭവം അരങ്ങേറിയത്. ഈ ആഴ്ചയുടെ തുടക്കത്തിൽ, വനാതിർത്തിയിൽ നിന്ന് ആളുകൾ താമസിക്കുന്ന സ്ഥലത്തേക്ക് ഒരു പുള്ളിപ്പുലിയിറങ്ങി. പുലിയെ കണ്ടതോടെ ഒരു തെരുവുനായ കുരച്ച് അക്രമാസക്തനായി. പുലിയുടെ മുന്നിൽ ഭയന്നു മാറുന്നതിന് പകരം, നായ അതിനെ ആക്രമിക്കുകയും ഏറെ ദൂരത്തേക്ക് വലിച്ചിഴയ്ക്കുകയും ചെയ്തു. പെട്ടെന്നുള്ള ആക്രമണത്തിൽ പുള്ളിപ്പുലിക്ക് പ്രതികരിക്കാനായില്ല. എങ്ങനെയെങ്കിലും നായയുടെ പിടിയിൽ നിന്ന് രക്ഷപ്പെടാനാണ് അത് ശ്രമിച്ചത്. ഏറെ നേരത്തെ ഏറ്റുമുട്ടലിനൊടുവിൽ തെരുവുനായ പിൻവാങ്ങിയതോടെ, പുള്ളിപ്പുലി സമീപത്തെ ഒരു പാടത്തേക്ക് ഓടി രക്ഷപ്പെട്ടു. ഏറ്റുമുട്ടലിൽ നായയ്ക്ക് കാര്യമായ പരിക്കുകളൊന്നും സംഭവിച്ചിട്ടില്ലെങ്കിലും, പുള്ളിപ്പുലിക്ക് പരിക്കേറ്റിരിക്കാമെന്നാണ് വനംവകുപ്പ് അധികൃതർ കരുതുന്നത്. പുലിക്ക് ചികിത്സ നൽകേണ്ടതുണ്ടോ എന്നതിൽ വനംവകുപ്പ് ഇതുവരെ തീരുമാനമൊന്നും എടുത്തിട്ടില്ല.
