ചാനൽ പാലം മറികടക്കുന്നതിനിടയിൽ അമ്മയും ഇരട്ട കുട്ടികളും കനാലിലേക്ക് വീണു; അഞ്ചുവയസ്സുകാരന് ദാരുണാന്ത്യം

തിരുവനന്തപുരം: അമ്മയോടൊപ്പം സഞ്ചരിക്കവേ സ്കൂട്ടർ കനാലിലേക്ക് വീണ് പിഞ്ചുകുഞ്ഞിനെ ദാരുണാന്ത്യം. അഞ്ചു വയസുള്ള പവിൻ സുനിലാണ് കനാലിൽ വീണ് മരിച്ചത്. അമ്മ ഇരട്ട കുട്ടികളെ സ്കൂട്ടറിൽ കൊണ്ടു പോകുമ്പോഴാണ് അപകടം സംഭവിച്ചത്.

സ്കൂളിലേയ്ക്കു പോകുന്ന വഴിയിൽ ചാനൽ പാലം മറികടക്കുന്നതിനിടയ്ക്ക് സ്കൂട്ടർ ചാനലിലേക്ക് വീഴുകയായിരുന്നു. നെയ്യാറ്റിൻകര ചാരോട്ടുകോണം ചെങ്കവിള റോഡിൽ മാറാടി ജംഗ്ഷനിന് സമീപമാണ് രാവിലെ അപകടം നടന്നത്. പരിക്കേറ്റ രണ്ടാമത്തെ കുട്ടിയേയും അമ്മ മഞ്ജുവിനെയും തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പവിൻ സുനിലിന്‍റെ മൃതദേഹം പാറശ്ശാല താലുക്ക് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.