എല്ലാ നല്ല കാര്യങ്ങള്‍ക്കും ഒരന്ത്യമുണ്ട്. എന്റെ നല്ല കാര്യങ്ങള്‍ മരിക്കുമ്പോള്‍ ഞാനും മരിക്കും… ആത്മഹത്യാക്കുറിപ്പുമായി കൊച്ചിയിലെ നക്ഷത്ര ഹോട്ടലിന് മുകളില്‍ നിന്ന് ചാടി യുവാവ് മരിച്ചു

കൊച്ചി കടവന്ത്രയിലെ നക്ഷത്ര ഹോട്ടലിന് മുകളില്‍ നിന്ന് ചാടി യുവാവ് ആത്മഹത്യ ചെയ്തു. പൊന്നുരുന്നി സ്വദേശിയായ ക്രിസ് ജോര്‍ജ് അബ്രഹാം (23) ആണ് മരിച്ചതെന്ന് തിരിച്ചറിഞ്ഞു. ഹോട്ടലിന് സമീപത്തെ ഗേറ്റിൽ വന്നു വീണ യുവാവ് തൽക്ഷണം മരിച്ചു.ഇന്നുച്ചയോടെയായിരുന്നു സംഭവം. ഹോട്ടലിലെത്തിയ ക്രിസ് നേരേ മുകള്‍നിലയിലേക്ക് പോയി താഴേക്ക് ചാടുകയായിരുന്നു. പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

‘എല്ലാ നല്ല കാര്യങ്ങള്‍ക്കും ഒരന്ത്യമുണ്ട്. എന്റെ നല്ല കാര്യങ്ങള്‍ മരിക്കുമ്പോള്‍ ഞാനും മരിക്കും..’ എന്നെഴുതിയ ആത്മഹത്യാ കുറിപ്പ് യുവാവിൽ നിന്ന് കണ്ടെത്തി. തന്നെ പള്ളി സെമിത്തേരിയില്‍ അടക്കണമെന്നും കുറിപ്പിലുണ്ട്.

ഇയാള്‍ ഹോട്ടലില്‍ മുറിയെടുത്തിരുന്നില്ലെന്നാണ് വിവരം. ഹോട്ടലിന്റെ ഏറ്റവും മുകളില്‍ ബാര്‍ പ്രവർത്തിക്കുന്നതിനാൽ ഹോട്ടിലില്‍ താമസിക്കാത്തവരും മുകളിലേക്ക് പോകുന്നത് സാധാരണമാണെന്ന് ജീവനക്കാര്‍ പറയുന്നു. പഠനം പൂര്‍ത്തിയാക്കി വിദേശത്തേക്ക് പോകാനുള്ള ഒരുക്കത്തിലായിരുന്നു ക്രിസ്. മരണത്തിന് കാരണമെന്താണെന്ന് വ്യക്തമല്ല. ക്രിസിന്റെ പെരുമാറ്റത്തില്‍ അസ്വാഭാവികമായൊന്നും തോന്നിയിരുന്നില്ലെന്നാണ് വീട്ടുകാരും പറയുന്നത്. എറണാകുളം ജനറല്‍ ആശുപത്രിയിലേക്ക് മാറ്റിയ മൃതദേഹം പോസ്റ്റുമോര്‍ട്ടത്തിനു ശേഷം ബന്ധുക്കള്‍ക്ക് വിട്ടുകൊടുക്കും.