യു.പി തെരഞ്ഞെടുപ്പ് ലക്ഷ്യമിട്ട് ദില്ലി സർക്കാർ ഒരുക്കുന്ന ‘ദില്ലി കി ദീപാവലി’ മേളയിൽ വിഷയം അയോധ്യ ക്ഷേത്രം;ത്യാഗരാജ് സ്റ്റേഡിയത്തിലെ ‘അയോധ്യ ക്ഷേത്രത്തിൽ’ നവംബർ നാലിന് കേജ്‍രിവാൾ പൂജ നടത്തും|AAP Ayodhya temple move eying on U.P election

ദില്ലി: ദീപാവലി ആഘോഷത്തിന്റെ ഭാ​ഗമായി ദില്ലി സർക്കാർ ഒരുക്കുന്ന ‘ദില്ലി കി ദീപാവലി’ മേളയിൽ വിഷയം അയോധ്യ ക്ഷേത്രം. ഐഎൻഎ മാർക്കറ്റിന് അടുത്തുള്ള ത്യാഗരാജ സ്‌റ്റേഡിയം സമുച്ചയത്തിൽ അയോധ്യ ക്ഷേത്രത്തിന്റെ മാതൃകയാണ് എഎപി സർക്കാർ ഒരുക്കുന്നത്. ത്യാഗരാജ് സ്റ്റേഡിയത്തിലെ ‘അയോധ്യ ക്ഷേത്രത്തിൽ’ നവംബർ നാലിന് കേജ്‍രിവാൾ പൂജ നടത്തും.

80 അടി വീതിയും 30 അടി ഉയരവുമാണ് ഡൽഹിയിലെ ക്ഷേത്ര മാതൃകയുടെ വിസ്തൃതി. സ്റ്റേജിന്റെ ആകെ ഉയരം 60 അടിയോളം വരും. ഉപമുഖ്യമന്ത്രി മനീഷ് സിസോദിയയുടെ ഓഫിസിൽ നിന്നുള്ള നിർദേശപ്രകാരം ഇവന്റ് മാനേജ്മെന്റ് കമ്പനിയുടെ നേതൃത്വത്തിലാണ് നിർമാണം. കഴിഞ്ഞ ചൊവാഴ്ചയാണ് നിർമാണം തുടങ്ങിയത്. കേജ്‌രിവാൾ അയോധ്യ സന്ദർശിച്ച അതേദിനം. മെറ്റൽ പൈപ്പുകൾകൊണ്ട് നിർമിക്കുന്ന ഫ്രെയിമിലാണ് ക്ഷേത്രം ഉയരുന്നത്. ക്ഷേത്രത്തിന്റെ പുറംഭാഗം തെർമോകോൾ കൊണ്ട് നിർമിക്കും. ക്ഷേത്ര നിർമാണത്തിന്റെ മുന്നോടിയായി ത്യാഗരാജ സ്റ്റേഡിയം സമുച്ചയത്തിലെ ഫുട്‌ബോൾ ഗോൾപോസ്റ്റുകളിലൊന്ന് നീക്കം ചെയ്തതായും അധികൃതർ അറിയിച്ചു.

ദില്ലി കി ദീപാവലി മേള 2019ലാണ് തുടങ്ങിയത്. 2019ൽ കൊണാട്ട് പ്ലേസിലെ സെൻട്രൽ പാർക്കിൽ ലേസർ ഷോ ഉൾപ്പടെ നാല് ദിവസത്തെ സാംസ്‌കാരിക പരിപാടി ഡൽഹി സർക്കാർ സംഘടിപ്പിച്ചു. പടക്കം പൊട്ടിക്കാതിരിക്കാനും വൈകുന്നേരങ്ങളിൽ പരിപാടിയിൽ പങ്കെടുക്കാനും ആളുകളെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് പരിപാടി. 2020ൽ, ദീപാവലി ദിനമായ നവംബർ 14ന് അക്ഷർധാം ക്ഷേത്രത്തിൽ കേജ്‌രിവാളും ഉപമുഖ്യമന്ത്രിയും മറ്റ് എഎപി നേതാക്കളും ചേർന്ന് ഒരു ‘മഹാപൂജ’ നടത്തി, അത് ടിവി ചാനലുകളിൽ തത്സമയം സംപ്രേക്ഷണം ചെയ്തു. ഈ വർഷം ത്യാഗരാജ് സ്റ്റേഡിയത്തിൽ ദീപാവലി ആഘോഷങ്ങളുടെ തത്സമയ സംപ്രേഷണവും സംഘടിപ്പിക്കാനുള്ള ഒരുക്കത്തിലാണ് സർക്കാർ. ഭവനങ്ങളിലിരുന്ന് ദീപാവലി ആഘോഷത്തിൽ പങ്കുചേരാൻ ദില്ലിക്കാരെ ക്ഷണിക്കുന്ന പരസ്യവും വിവിധ ചാനലുകളിൽ സംപ്രേഷണം ചെയ്യുന്നുണ്ട്.
വരാൻ പോകുന്ന യു.പി തെരഞ്ഞെടുപ്പിൽ ബിജെപിക്കെതിരെ ഒരു കൈ നോക്കാനാണ് ആംആദ്മി പാർട്ടിയുടെ തീരുമാനം.അതിന്റെ ഭാ​ഗമായാണ് കേജ്രിവാളിന്റെ ഈ ആയോധ്യക്ഷേത്രം എന്നാണ് വിലയിരുത്തപ്പെടുന്നത്

ദില്ലിയോ‍ട് ഏറ്റവും അടുത്തു കിടക്കുന്ന സംസ്ഥാനം എന്ന നിലയിലാണ് യുപിയിൽ ആംആദ്മി മത്സരിക്കുന്നത്. കർഷകർ പിന്തുണയ്ക്കുമെന്ന പ്രതീക്ഷയിലാണ് കെജ്രിവാൾ. അതുകൊണ്ടാണ് കർഷക സമരത്തിന് എല്ലാ പിന്തുണയും നൽകി കേന്ദ്ര സർക്കാരിന് എതിരായ പ്രതിഷേധം അണയാതെ സൂക്ഷിക്കാൻ പാർട്ടി ശ്രമിക്കുന്നത്. തിരഞ്ഞെടുപ്പിനു മുന്നോടിയായി നടന്ന ‘തിരംഗ സങ്കൽപ്’ യാത്രയിൽ യുപിയിലെ ക്രമസമാധാനനില, വിദ്യാഭ്യാസം, ആരോഗ്യം തുടങ്ങിയ വിഷയങ്ങൾക്കാണ് ഊന്നൽ നൽകിയത്. അടുത്ത വർഷം തിരഞ്ഞെടുപ്പു നടക്കുന്ന എല്ലാ സംസ്ഥാനങ്ങളിലും എഎപി ഉയർത്തുന്നത് ഏറ്റവും കുറഞ്ഞ നിരക്കിൽ വൈദ്യുതി എന്നതും. ഡൽഹിയിൽ പരീക്ഷിച്ചു വിജയിച്ച ഇളവുകൾ അധികാരത്തിൽ എത്തിയാൽ യുപിയിലും നടപ്പാക്കുമെന്നും എഎപി ആവർത്തിക്കുന്നു.